23.02.2026 | 13:14
Բուժաշխատողները բողոքում են․ ակցիա՝ ապահովագրական համակարգի բացերի շուրջ ԱԺ լսումներ անցկացնելու պահանջով
Պուտինի՝ փետրվարին Թուրքիա նախատեսված այցը հետաձգվել է
Քաղաքականություն
08.02.2024 | 12:16
ՌԴ նախագահ Վլադիմիր Պուտինի այցը Թուրքիա, որը նախատեսված էր փետրվարին, հետաձգվել է։ Նախնական տվյալներով՝ այն տեղի կունենա ապրիլի վերջին կամ մայիսի սկզբին, ՌԻԱ Նովոստիին ասել է Անկարայում դիվանագիտկան աղբյուրը։
«Երկու երկրներում ընտրական ցիկլի հետ կապված, ինչպես գիտեք, Թուրքիայում անցկացվելու են ՏԻՄ ընտրություններ, իսկ Ռուսաստանում՝ նախագահական, որոշվել է (Պուտինի) այցը հետաձգել, նախնական տվյալներով՝ ապրիլի վերջ-մայիսի սկիզբ»,- ասել է գործակալության զրուցակիցը:
Նշենք, որ ավելի վաղ ռուսական և թուրքական դիվանագիտական աղբյուրներն ու միջազգային լրատվամիջոցները հայտնում էին, որ Պուտինի այցը Թուրքիա տեղի կունենա փետրվարի 12-ին։ Այն, որ այցը լինելու է փետրվարին, հայտնել էր նաև ՌԴ նախագահի արտաքին հարաբերությունների հարցերով օգնական Յուրի Ուշակովը։
Օրերս էլ հարցազրույցում Թուրքիայի ԱԳ նախարար Հաքան Ֆիդանը թուրքական A Haber-ի հետ հարցազրույցում հաստատել էր Վլադիմիր Պուտինի մոտալուտ այցը երկիր՝ չհայտարարելով ստույգ ամսաթիվը։ Նա նշել էր, որ բանակցությունների օրակարգում են լինելու էներգետիկան, պատերազմը Գազայում, Սևծովյան առևտրային ուղիները և Սիրիան։ Պուտինի մամուլի խոսնակ Դմիտրի Պեսկովը ևս պարբերաբար հայտարարում էր, որ ՌԴ նախագահի այցը սպասվում է առաջիկայում։
Հիշեցնենք՝ դեռևս անցյալ տարվա դեկտեմբերին ամփոփիչ ասուլիսի ժամանակ Վլադիմիր Պուտինը հայտարարել էր, որ մտադիր է 2024 թվականի սկզբին այցելել Թուրքիա և բանակցություններ անցկացնել նախագահ Ռեջեփ Թայիփ Էրդողանի հետ։
