01.07.2026 | 20:38
Ադրբեջանի և Հայաստանի հարաբերությունների կարգավորման գործընթացը հաջողությամբ շարունակվում է․ Ալիևը՝ ԵՀ նախագահին
Հայաստանն ուժեղ է Սփյուռքով. ԱԺ նախագահն այցելել է արիտունցիներին
08.07.2017 | 16:05
Աղավնաձորի «Արի տուն» ճամբարում հուլիսի 7-ին տեղի է ունեցել ՀՀ սփյուռքի նախարարության համանուն ծրագրի երկրորդ փուլի փակման հանդիսավոր արարողությունը, որին մասնակցել են ՀՀ Ազգային ժողովի նախագահ Արա Բաբլոյանը, ՀՀ սփյուռքի նախարար Հրանուշ Հակոբյանը:
Ինչպես տեղեկացնում է ԱԺ մամուլի ծառայությունը, արիտունցիները ճամբարային օրերի ընթացքում պատրաստել էին համերգային ծրագիր, որն էլ ներկայացրել են հյուրերին:
Ողջույնի իր խոսքում ՀՀ ԱԺ նախագահը, ուրախություն հայտնելով միջոցառմանը մասնակցության համար, նշել է. «Նման միջոցառումների ելակետը մեկն է՝ Հայաստանն ու Սփյուռքը միասին ավելի մեծ հնարավորություն ունեն հասնելու համազգային նպատակներին, քան առանձին-առանձին, որովհետև Հայաստանն ուժեղ է Սփյուռքով, Սփյուռքը՝ Հայաստանով»:
«Հայաստանում անցկացրած օրերին դուք հնարավորություն եք ունենում անմիջականորեն ճանաչել հայրենիքը, որի մասին ձեզանից ոմանք, միգուցե, գիտեին ընդամենը ծնողների, բարեկամների պատմածներից կամ հեռուստացույցից ու համացանցից»,- նշել է Արա Բաբլոյանը՝ կարեւորելով, որ այս այցով, հայրենիքը ճանաչելով՝ նրանք դառնում են Հայրենիք-Սփյուռք կամրջի հուսալի հենասյուներից մեկը. հետեւաբար, «Արի տուն»-ն իսկապես հայրենանպաստ ու հայամետ ծրագիր է:
ՀՀ ԱԺ նախագահը հույս է հայտնել, որ արիտունցիների կապը հայրենիքի հետ ավելի կսերտանա, իսկ նրանք կլինեն Հայաստանի դեսպաններն իրենց երկրներում եւ Սփյուռքի դեսպանները՝ Հայաստանում:
Համերգի ավարտից հետո խորհրդարանի ղեկավարը ՀՀ սփյուռքի նախարարի հետ մասնակցել է նաեւ հրաժեշտի խարույկի վառման արարողությանը, շուրջպար բռնել եւ լուսանկարվել արիտունցիների հետ:
