22.07.2026 | 23:29
СHP-ի նկատմամբ ճնշումների ֆոնին՝ Թուրքիայի ընդդիմության առաջնորդը հայտնել է նոր կուսակցություն ստեղծելու մասին
Ադրբեջանական որոշ ԶԼՄ-ներ անհիմն մեղադրանքներ են հրապարակում ՀՀ-ում ԵՄ առաքելության մասին․ Բաքվում ԵՄ պատվիրակության ղեկավար
Քաղաքականություն
06.02.2024 | 17:18
Բաքվում ԵՄ պատվիրակության ղեկավար Պետեր Միխալկոն անդրադարձել է ադրբեջանական քարոզչամեքենայի կողմից ՀՀ-ում տեղակայված Եվրամիության քաղաքացիական դիտորդական առաքելության դեմ իրականացվող արշավին։
«Ափսոսում եմ, որ վերջին օրերին ադրբեջանական որոշ լրատվամիջոցներ բացարձակապես անհիմն մեղադրանքներ են հրապարակել Հայաստանում ԵՄ առաքելության հասցեին։ Ես ընդգծում եմ, որ EUMA-ն քաղաքացիական, անզեն առաքելություն է, և նրա մանդատը դիտորդական առաքելությունն է»,- գրել է Միխալկոն X-ի իր էջում։
Ըստ դիվանագետի՝ առաքելության ներկայությունը նպատակ ունի նպաստել կայունության և վստահության ամրապնդմանը:
«ԵՄ-ն կշարունակի իր ջանքերը՝ աջակցելու Ադրբեջանի և Հայաստանի միջև խաղաղ կարգավորմանը»,- հավելել է ԵՄ պատվիրակության ղեկավարը։
Նշենք, որ վերջին օրերին ադրբեջանական լրատվամիջոցները կրկին ակտիվացրել են արշավը ԵՄ դիտորդական առաքելության դեմ՝ Հայաստանի հետ սահմանին Չեխիայի քաղաքացու ձերբակալումից հետո։ Ադրբեջանական լրատվամիջոցները, մասնավորապես, պնդում էին, թե ձերբակալվածը, իբր, ԵՄ առաքելության հետ կապ ունի և լրտեսություն է իրականացնում։
Էմմա Չոբանյան
