12.08.2026 | 14:29
Հալածանքների եմ ենթարկվել ՊԵԿ-ում․ Հայկ Ֆարմանյան. ՏԵՍԱՆՅՈՒԹ
Բլինքենը Եգիպտոսում է՝ Իսրայելի և ՀԱՄԱՍ-ի միջև հրադադարի փնտրտուքով
Քաղաքականություն
06.02.2024 | 15:57
ԱՄՆ պետքարտուղար Էնթոնի Բլինքենն այսօր Կահիրեում էր՝ հանդիպելու Եգիպտոսի առաջնորդների հետ, որոնք, ըստ ամերիկացի պաշտոնյաների, կկենտրոնանան Իսրայել-ՀԱՄԱՍ պատերազմում հրադադարի շուրջ բանակցությունների վրա՝ պատանդների ազատ արձակման դիմաց, գրում է AP-ն:
Բլինքենի այցը համընկել է Եգիպտոսում անհանգստության աճով, քանի որ Իսրայելը հայտարարել է Գազայի հատվածում ռազմական գործողությունները դեպի Եգիպտոսի սահման ընդլայնելու մտադրության մասին, որտեղ ապաստան են գտել տեղահանված պաղեստինցիները։
Իսրայելի պաշտպանության նախարարը հայտարարել էր, որ Իսրայելի ռազմական գործողությունները կհասնեն Եգիպտոսի սահմանին գտնվող Ռաֆահ քաղաք, որտեղ Գազայի 2,3 միլիոն բնակչության գրեթե կեսն է ապաստան գտել ու այժմ ապրում է ավելի ու ավելի վատթարացող անմխիթար պայմաններում։
Եգիպտոսը զգուշացրել է, որ Իսրայելական զորքերի տեղակայումը սահմանի երկայնքով կսպառնա խաղաղության պայմանագրին, որը կնքվել է երկու երկրների միջև ավելի քան 4 տասնամյակ առաջ։ Եգիպտոսը մտավախություն ունի, որ ռազմական գործողությունների ընդլայնումը դեպի Ռաֆահ սարսափած պաղեստինցիներին կստիպի հատել սահմանը, իսկ սա մի սցենար է, որը Եգիպտոսը հայտարարել է՝ թույլ չի տա։
Եգիպտոսի նախագահ Աբդել Ֆաթահ ալ-Սիսիի հետ հանդիպման ժամանակ Բլինքենը կրկնել է, որ պաղեստինցիները չպետք է վտարվեն Գազայից։
