ՌԴ-ն ապասառեցրել է Հյուսիսային Կորեայի ակտիվների մի մասը՝ զենքի մատակարարումների դիմաց․ NYT

ՌԴ-ն Հյուսիսային Կորեային թույլ է տվել բացել միլիոնավոր դոլարների սառեցված ակտիվները և, հավանաբար, օգնել է Փհենյանին մուտք գործել միջազգային բանկային ցանցեր այն բանից հետո, երբ Հյուսիսային Կորեան զենք է  փոխանցել Մոսկվային Ուկրաինայի դեմ պատերազմի համար։ Այս մասին գրել է The New York Times-ը՝ վկայակոչելով ԱՄՆ դաշնակից երկրների հետախուզական պաշտոնյաներին, փոխանցում է BBC-ի ռուսական ծառայությունը։

Անցյալ ամիս Սպիտակ տունը հայտարարել է, որ ապացույցներ ունի Հյուսիսային Կորեայի կողմից ՌԴ-ին բալիստիկ հրթիռների փոխանցման մասին։ ԱՄՆ-ի տվյալներով՝ դրա դիմաց Հյուսիսային Կորեան ակնկալում էր ստանալ զենք կամ ռազմական տեխնոլոգիա։

Ըստ բրիտանական վերլուծական կենտրոնի՝ ըստ երևույթին, Փհենյանը նաև մինչև 2,5 միլիոն փամփուշտ է ուղարկել Ռուսաստանին:

The New York Times-ը գրում է, որ պարզ չէ՝ արդյո՞ք ՌԴ-ն Հյուսիսային Կորեային ռազմական տեխոնոլոգիաներ տրամադրել է, սակայն բանկային ոլորտում նոր կապերը դարձել են երկու երկրների միջև հարաբերությունների ամրապնդման հերթական վկայությունը։ Հետախուզության պաշտոնյաների խոսքով՝ Ռուսասանը թույլ է տվել Հյուսիսային Կորեայի 30 մլն դոլար սառեցված ակտիվներից բացել 9 մլն-ը, որոնք պահվում են ռուսական ֆինանսական հաստատություններում։

Փհենյանը, ենթադրաբար, կօգտագործի այդ գումարը նավթ գնելու համար։ Բացի այդ, հետախուզական տվյալները ցույց են տալիս, որ մի ընկերություն վերջերս հաշիվ է բացել մեկ այլ ռուսական բանկում, ինչը ենթադրում է, որ Մոսկվան կարող է օգնել Փհենյանին շրջանցել ՄԱԿ-ի պատժամիջոցները, որոնք արգելում են բանկերի մեծ մասին բիզնես վարել նրա հետ: Նոր բանկային հաշիվը բացվել է չճանաչված Հարավային Օսիայում, որը սերտ կապեր ունի Ռուսաստանի հետ։

Ամերիկացի պաշտոնյաներին հայտնի չեն Մոսկվայի ու Փհենյանի պայմանավորվածությունների մանրամասները, սակայն նրան նշել են, որ նշված ֆինանսական գործողությունները համահունչ են ԱՄՆ-ի ակնկալիքներին այն մասով, թե ինչ կարող էր Հյուսիսային Կորեան պահանջել Ռուսաստանից զենքի մատակարարման դիմաց։

Էմմա Չոբանյան