Սերբիան «խիստ բողոք» է հայտնել ԵԽԽՎ-ին՝ Ադրբեջանի պատվիրակության լիազորությունները սահմանափակելու որոշման համար

Եվրոպայի խորհրդի Խորհրդարանական վեհաժողովում (ԵԽԽՎ) Սերբիայի պատվիրակությունը բողոք է հղել կառույցի նախագահ Թեոդորոս Ռուսոպուլոսին՝ Ադրբեջանի պատվիրակության դեմ ընդունված որոշման կապակցությամբ, գրում են ադրբեջանական լրատվամիջոցները։

Նշվում է, որ սերբական պատվիրակությունն ափսոսանք է հայտնել, որ 2023 թվականի դեկտեմբերի 17-ին երկրում կայացած խորհրդարանական ընտրություններից հետո Սերբիայի Ազգային ժողովի ձևավորման գործընթացի պատճառով սերբական պատվիրակությունը չի կարողացել մասնակցել այդ բանաձևի քվեարկությանը։

«Սերբիայի պատվիրակությունը սույնով ցանկանում է իր անհամաձայնությունը հայտնել ադրբեջանական պատվիրակության նկատմամբ վերաբերմունքի և շատ կասկածելի հիմքերով ընդունված բանաձևի կապակցությամբ։ Մենք խորապես համոզված ենք, որ այս բանաձևը հետքայլ է ԵԽԽՎ-ի ներսում իրական երկխոսությունից և միայն նպաստում է շարունակական բևեռացմանը։ Դա նաև վկայում է Վեհաժողովում արժեքների խորացող դեգրադացիայի մասին։ ԵԽԽՎ-ում Սերբիայի պատվիրակությունն իր խիստ բողոքն է հայտնում ընդունված բանաձևի կապակցությամբ և կոչ է անում վերանայել այն՝ Վեհաժողովի և Եվրոպայի խորհրդի հեղինակության ու կայացած դերի համար բացասական հետևանքներից խուսափելու համար»,- ասվում է նամակում։

Սերբիայի 7 հոգանոց պատվիրակությունը խնդրանքով դիմել է կառույցի նախագահին՝ «վճռականորեն գործել և չեղյալ համարել Ադրբեջանի պատվիրակության լիազորությունների վավերացումը մերժող բանաձևը»։

Հիշեցնենք, որ հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնակարգային պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ էր մնացել։

Էմմա Չոբանյան