07.04.2026 | 21:55
Արարատ Միրզոյանը նվեր է ստացել Օմանի ԱԳ նախարարից
Ադրբեջանական ոսկու հանքերի կապը՝ Tesla-ի, Apple-ի և HP-ի հետ․ Forbidden Stories-ի անդրադարձը
Քաղաքականություն
05.02.2024 | 13:00
Վերջին ամիսներին Ադրբեջանը ցնցվեց երկրում ԶԼՄ-ների ազատությունը վտանգող ալիքով․ գրում է Forbidden Stories-ը։ 2023 թվականի նոյեմբերին «Abzas Media »-ի լրագրողներ Ուլվի Հասանլին, Սևինչ Վաքիֆքիզին և թիմի ադմինիստրատիվ անդամ Մահամմադ Կելակովը ձերբակալվել էին Ադրբեջանի իշխանությունների կողմից։ Abzas Media-ն Ադրբեջանում մնացած անկախ լրատվամիջոցներից մեկն էր, որը հետաքննում է կոռուպցիան երկրում, արձանագրում է կայքի հոդվածագիրը։
Այսօրվա դրությամբ Abzas Media-ի վեց անդամներ ձերբակալված են արտարժույթի մաքսանենգության մեղադրանքով։ Հատկանշական է, որ նրանց ձերբակալությունը համընկել է լրատվամիջոցի մտադրության հետ՝ հետաքննելու ադրբեջանական բանտերում խոշտանգումները, ինչպես նաև՝ երկրի ամենախոշոր ոսկու հանքերից մեկի ազդեցությունը շրջակա միջավայրի վրա:
Դեռևս 2023 թվականի հունիսին Abzas Media-ի լրագրողները փորձել են ուսումնասիրել Ադրբեջանի արևմուտքում ոսկու արդյունահանման «կեղտոտ գործերը» և դրա համար ահաբեկվել ու ձերբակալվել են։
Forbidden Stories-ը և նրա գործընկերները կարողացել են հետևել ոսկու ճանապարհին՝ բացահայտելով դրա կապն այնպիսի հայտնի կորպորացիաների հետ, ինչպիսիք են Tesla-ն, Apple-ը և HP-ն:
Հետաքննող լրագրողները պարզել են, որ Ադրբեջանի կառավարությունից ու Anglo Asian Mining-ից (AAM) բացի ադրբեջանական հանքի խոշորագույն շահառուներից մեկը շվեյցարական նավթի և ոսկու վերամշակման հսկա MKS PAMP-ն է: Լինելով աշխարհի 10 խոշորագույն ոսկու վերամշակման գործարաններից մեկը՝ MKS PAMP-ը վաճառում է ոսկի, որի մի մասը ձեռք է բերում AAM-ից ու Գեդաբեկ հանքավայրից։ Ընկերության գնորդներն այնպիսի հայտնի ընկերություններ՝ ինչպիսիք են Tesla-ն, HP-ն, Microsoft-ն և Apple-ը:
Նախագծի բացահայտումները նաև լույս են սփռում Ադրբեջանի կասկածելի գործելաոճի վրա, երբ խոսքը վերաբերում է բանտերի կառավարմանը: 2014 թվականից ի վեր Եվրախորհրդից Ադրբեջան է հոսել ավելի քան 23 միլիոն եվրո՝ իբր զարգացման ծրագրերի համար:
Forbidden Stories-ի և նրա գործընկերների կողմից ուսումնասիրված բաց փաստաթղթերը ցույց են տալիս, որ միջոցները նախատեսված են եղել «դատական համակարգի կարողությունների զարգացման», «կադրերի վերապատրաստման», «բանտային պայմանների նկատմամբ վերահսկողության բարձրացման» և «թափանցիկության բարելավման և կոռուպցիայի կանխարգելման համար»:
Այնուամենայնիվ, ադրբեջանական բանտերում փակ պայմանները լուրջ հարցեր են առաջացնում այդ միջոցների իրական ազդեցության վերաբերյալ:
