26.06.2026 | 02:03
ԱԱ-2026. Գերմանիան անակնկալ պարտություն կրեց, Կոտ դ’Իվուարը հաղթեց. ՏԵՍԱՆՅՈՒԹ
Դատավոր Մասիս Մելքոնյանը չի մեկնաբանում` ինչու է «սրտիկում» ԲԴԽ նախագահի գրառումները․ ՏԵՍԱՆՅՈՒԹ
Հասարակություն
02.02.2024 | 16:17
Երևանի ընդհանուր իրավասության քրեական դատարանի դատավոր Մասիս Մելքոնյանն արտառոց ոչինչ չի տեսնում նրանում, որ անկախ դատական իշխանությունը գործադիր իշխանության՝ Կառավարության շենքում է Դատավորների ընդհանուր ժողով անցկացնում։ Այս մասին Մելքոնյանն ասաց լրագրողների հետ զրույցում Դատավորների ընդհանուր ժողովին ընդառաջ։
Մասիս Մելքոնյանը քաղաքական հնչեղություն ունեցող մի շարք գործերով խափանման միջոց կալանավորման միջնորդություններ է քննել, որոնց առնչությամբ նրա կայացրած որոշումները քննադատությունների առիթ են տվել։ Ասում է՝ քննադատություններին հանգիստ է վերաբերվում։
«Ցանկացած դատավոր դարձած անձ պետք է ունենա համապատասխան անձնական, մասնագիտական, դաստիարակչական որակներ՝ իրեն ուղղված քննադատությանը հանգիստ վերաբերվելու համար», – Factor TV-ի հարցին ի պատասխան ասաց Մասիս Մելքոնյանը։
Քաղաքական հնչեղություն ունեցող գործերից մեկով Հայաստանի երկրորդ նախագահ Ռոբերտ Քոչարյանի որդու՝ Լևոն Քոչարյանի կալանքի որոշումը Մելքոնյանն է կայացրել։
Հատկանշական է, որ Լևոն Քոչարյանի փաստաբանները նրա ձերբակալման դեմ բողոք էին ներկայացրել, սակայն, տեղեկանալով, որ այն մակագրվել է դատավոր Մելքոնյանին, որոշում էին կայացրել հրաժարվել այդ բողոքից։ Դատավոր Մելքոնյանը սա պաշտպանական մարտավարություն է համարում։
Մասիս Մելքոնյանը ակտիվորեն հետևում է ԲԴԽ նախագահ Կարեն Անդրեասյանի ֆեյսբուքյան գրառումներին` ավելին, ակտիվորեն հավանում կամ «սրտիկներ» է դնում դրանց։ Մեր հարցին՝ ինչո՞ւ է դատավորը «սրտիկում» ԲԴԽ նախագահի գրառումները, Մելքոնյանն ասաց, թե մեկնաբանություն չունի։ Չպատասխանեց նաև հարցին՝ դրանք, ըստ դատավորի, քաղաքական չեզոքությամբ արված գրառումներ են, թե ոչ։
Մանրամասները՝ տեսանյութում
Արաքս Մամուլյան
