17.03.2026 | 23:25
ԻՀՊԿ-ն հաստատել է «Բասիջ» ուժերի հրամանատար Ղոլամռեզա Սուլեյմանիի մահը
ՌԴ ԿԸՀ-ն նախագահի ընդդիմադիր թեկնածու Նադեժդինի օգտին ստորագրություններում «սխալներ է հայտնաբերել»
Քաղաքականություն
02.02.2024 | 16:40
ՌԴ Կենտրոնական ընտրական հանձնաժողովի աշխատանքային խումբը սխալներ է հայտնաբերել Պետդումայի նախկին պատգամավոր Բորիս Նադեժդինին որպես ՌԴ նախագահի թեկնածու գրանցելու համար ներկայացված ստորագրություններում։ Այս մասին ասել է ԿԸՀ փոխնախագահ Նիկոլայ Բուլաևը, նշում է The Moscow Times-ը։
Նա նշել է, թե 100 հազար ստորագրություն հավաքելը երբեք առանց սխալների չի լինում, ուստի ընտրական հանձնաժողովն աչք է փակում մանր անճշտությունների վրա։
«Բայց երբ տեսնում ենք տասնյակ և ավելի քան մեկ տասնյակ մարդկանց, ովքեր այլևս այս աշխարհում չեն, և նրանք ստորագրություն են տվել, հարց է առաջանում էթիկական չափանիշների ամբողջականության մասին, որոնք օգտագործվում են, այդ թվում՝ ստորագրահավաք իրականացրածների կողմից»,- նշել է Բուլաևը:
Նրա խոսքով՝ տեսուչները թեկնածուների ստորագրություններում, իբր, մահացած մարդկանց հետքեր են հայտնաբերել։ Բուլաևն առաջարկել է Նադեժդինին հրավիրել փետրվարի 5-ին առաջադրված թեկնածուների կողմից ներկայացված փաստաթղթերի և ստորագրությունների ստուգման աշխատանքային խմբի հանդիպմանը՝ «ստուգման ընթացակարգերի արդյունքները» ցույց տալու և հայտնաբերված սխալների վերաբերյալ արձանագրություններ ներկայացնելու համար:
Սպասվում է, որ փետրվարի 7-ին Կենտրոնական ընտրական հանձնաժողովը կավարտի ստորագրությունների ստուգումը և որոշում կկայացնի նախագահի թեկնածուների՝ ընտրություններին մասնակցությունը թույլատրելու կամ չթույլատրելու վերաբերյալ։
