15.09.2026 | 17:33
Աջակցում ենք ՀՀ-ի հետ խաղաղությանը․ Հաքան Ֆիդանը՝ Բաքվում
Բիշքեկի միակ ՋԷԿ-ում պատահար է տեղի ունեցել. տուժածներ կան
Քաղաքականություն
02.02.2024 | 12:56
Բիշքեկում փետրվարի 1-ի լույս 2-ի գիշերը պայթյուն է տեղի ունեցել քաղաքի միակ ՋԷԿ-ում։ Ղրղզստանի մայրաքաղաքի գրեթե ամբողջ հարավային հատվածում դադարեցվել է էլեկտրաէներգիայի և տաք ջրի մատակարարումը։ Միջադեպի հետևանքով տուժել է 2493 բազմաբնակարան շենք, գրում է Meduza-ն։
Էներգետիկայի նախարարության հաղորդմամբ՝ ՋԷԿ-ում պայթել է կաթսաներից մեկը։ Ղրղզստանի ԱԻՆ ղեկավար Բոբեկ Աժիկեևը չի բացառել, որ վթարի պատճառ կարող էր լինել դիվերսիան, քանի որ, նրա խոսքով, արտակարգ իրավիճակից առաջ օբյեկտում թակելու ձայներ են լսվել։ Նա, սակայն, չի բացառել նաև տեխնածին պատճառները։
Վթարի հետևանքով ՋԷԿ-ում աշխատող հինգ մարդ տուժել է, երկուսի վիճակը գնահատվում է ծայրահեղ ծանր՝ մարմնի 80 տոկոսի այրվածքներով։
ՏԱՍՍ-ի փոխանցմամբ՝ վթարի պատճառով Ղրղզստանի վարչապետ Ակիլբեկ Ժապարովն ընդհատել է աշխատանքային այցը Ալմաթի, որտեղ պետք է մասնակցեր Եվրասիական միջկառավարական խորհրդի հերթական նիստին։ Նախագահ Սադիր Ժապարովն իր հերթին անձնական հսկողության տակ է վերցրել Բիշքեկի ՋԷԿ-ում ստեղծված իրավիճակը։
ԱԻՆ ղեկավարի խոսքով՝ վթարի հետևանքներն ամբողջությամբ վերացնելու համար կպահանջվի 5-7 օր։
Էմմա Չոբանյան
