21.06.2026 | 02:11
ԱԱ-2026. Գերմանիան կամային հաղթանակի հասավ վերջնամասում. ՏԵՍԱՆՅՈՒԹ
Իրանը անպատասխան չի թողնի ԱՄՆ-ի սպառնալիքները. Իսլամական հեղափոխության պահապանների կորպուսի հրամանատար
Քաղաքականություն
31.01.2024 | 17:08
Իրանական կողմն անպատասխան չի թողնի արևմտյան երկրներից, հատկապես ԱՄՆ-ի կառավարությունից բխող որևէ սպառնալիք։ Այս մասին հայտարարել է Իսլամական հեղափոխության պահապանների կորպուսի (ԻՀՊԿ) հրամանատար, գեներալ Հոսեյն Սալամին, փոխանցում է Tasnim news agency-ն։
Հիշեցնենք՝ ԱՄՆ նախագահ Ջո Բայդենը հայտարարել էր, որ Իրանը պատասխանատվություն է կրելու Հորդանանի հյուսիս-արևելքում ամերիկյան ռազմաբազայի վրա հարձակում կատարածներին զենք տրամադրելու համար։
«Պատահում է, որ մեր թշնամիները սպառնալիքներ են հնչեցնում, և այս օրերին մենք ինչ-որ սպառնալիքներ ենք լսում ամերիկացի պաշտոնյաներից։ Մենք պատասխանում ենք, որ մեզ արդեն փորձել եք, հիմա մենք լավ գիտենք միմյանց։ Մենք ոչ մի սպառնալիք անպատասխան չենք թողնի, մենք պատերազմ չենք փնտրում, բայց պատերազմից չենք վախենում»,- ասել է Սալամին։
Հիշեցնենք, որ անօդաչու թռչող սարքի հարվածը, որի հետևանքով զոհվել էր երեք ամերիկացի զինվորական և վիրավորվել ավելի քան 30 մարդ, տեղի էր ունեցել հունվարի 28-ին։ Սպիտակ տունը հարձակման մեջ մեղադրել էր Իրանի կողմից աջակցվող ծայրահեղական զինված խմբավորումներին, որոնք գործում են Սիրիայում ու Իրաքում։ Ավելի ուշ Պենտագոնը հայտարարել էր, որ միջադեպում «Քաթայբ Հեզբոլլահի» խմբավորման հետքն է տեսնում։ Իրանը պաշտոնապես հերքում է իր մասնակցությունը ամերիկյան բազայի վրա հարձակմանը։
