Հնդկաստանում տոնական զորահանդեսի ժամանակ ողջունել են Մակրոնին ու ֆրանսիական զորախմբին` որպես գլխավոր հյուրի

Ֆրանսիայի նախագահ Էմանուել Մակրոնը Հնդկաստան կատարած իր այցի շրջանակում վարչապետ Նարենդրա Մոդիի հետ շրջել է արևմտյան պատմական վայրերում և որպես գլխավոր հյուր՝ դիտել Հանրապետության օրվա տոնակատարությունները, գրում է Al Arabiya-ն՝ վկայակոչելով AP-ին։

Մոդին ողջունել է  Մակրոնին Ջայպուրի 18-րդ դարի աստղադիտարանում, այնուհետև երկու երկրների ղեկավարները շրջել են ավտոմեքենայով, Մակրոնը ողջունել է փողոցներում հավաքված հազարավոր մարդկանց։

«Նրա ներկայությունը ոչ միայն ամրապնդում է մեր ազգերի միջև կապերը, այլև կարևոր գլուխ է ավելացնում մեր ընդհանուր բարեկամության և համագործակցության պատմությանը»,- գրել է Մոդին X-ում:

Մակրոնն ու Մոդին ավելի ուշ բանակցություններ են անցկացրել Ջայպուրի հյուրանոցներից մեկում՝ նախքան Նյու Դելի թռչելը: Հանդիպման արդյունքների մասին պաշտոնական հայտարարություն չի եղել, բայց ակնկալվում էր, որ նրանք քննարկել են այնպիսի հարցեր, ինչպիսիք են տնտեսությունը, պաշտպանությունը, տիեզերական և կիբերանվտանգությունը, ինչպես նաև Ֆրանսիայի դերը Հնդկ-Խաղաղօվկիանոսյան տարածաշրջանում:

Այնուհետև, որպես գլխավոր հյուր, Ֆրանսիայի նախագահը մասնակցել է Դելիում զինվորական շքերքին՝ նվիրված Հանրապետության հիմնադրման 75-րդ ամյակին։

Ֆրանսիական զորախումբը ևս մասնակցել է շքերքին․ ֆրանսիական օտարերկրյա լեգեոնի 95 հոգանոց զորախումբը և Ֆրանսիայից ժամանած 33 հոգանոց զինվորական նվագախումբը երթով անցել են Կարտավիա արահետով։

Ֆրանսիայի նախագահն արձագանքել է շքերթին ֆրանսիական զորախմբի մասնակցությանը։

«Մեծ պատիվ Ֆրանսիայի համար։ Շնորհակալություն, Հնդկաստա՛ն»,- գրել է Մակրոնը X-ում՝ տեսանյութ հրապարակելով։

Էմմա Չոբանյան