17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
«Դա չի կարող դիտարկվել որպես վստահության ամրապնդման միջոց»․ Ադրբեջանի ԱԳՆ-ն մեղադրանքներով է արձագանքել ՀՀ-ի մարդասիրական քայլին
Քաղաքականություն
26.01.2024 | 11:47
Ադրբեջանի ԱԳՆ-ն հաղորդագրություն է տարածել՝ անդրադառնալով ՀՀ-ի մարդասիրական քայլին, որի մասին երեկ հայտնել էր ՀՀ ԱԱԾ-ն։ Հաղորդագրության մեջ ասվում է, որ «Բաքուն ի գիտություն է ընդունում Հայաստանի Ազգային անվտանգության ծառայության 2024 թվականի հունվարի 25-ի հայտարարությունը Ադրբեջանին ականների քարտեզներ տրամադրելու մտադրության մասին»։ Բաքուն մեղադրանքներ է հնչեցրել ՀՀ-ի հասցեին՝ պնդելով, թե «Հայաստանն իրականացրել է ադրբեջանական տարածքների զանգվածային ու նպատակային ականապատում»։
«Մենք բազմիցս նշել ենք, որ ներկայացված քարտեզներն անօգուտ են, թերի և չեն արտացոլում իրական իրավիճակը։ Թեև այս քարտեզները ցույց են տալիս, որ մեր տարածքներում թաղված է 400 հազար ական, իրականում ականների թիվը գերազանցում է 1 միլիոնը»,-ասվում է Բաքվի ԱԳՆ-ի հաղորդագրության մեջ։
Ադրբեջանի արտաքին գերատեսչությունը պնդում է, թե 2020 թ-ի Արցախյան պատերազմից հետո ականների վրա պայթելու հետևանքով տուժել է 342 մարդ, որից 65-ը մահացել է։ Նաև մեղադրանքներ են հնչում այն մասին, որ Հայաստանը Արցախում 2020 թ-ի պատերազմից հետո ականապատումներ է իրականացրել։
«Հայկական կողմի այս հայտարարությունը ցույց է տալիս, որ այդ երկրի նպատակը մարդասիրական գործընթացին նպաստելը չէ, և այդ քայլը չի կարող դիտարկվել որպես վստահության ամրապնդման միջոց։ Ադրբեջանական կողմն ակնկալում է, որ Հայաստանը կտրամադրի բոլոր ականապատ տարածքների ճշգրիտ քարտեզները, որոնք ամբողջությամբ չեն տրամադրվել Ադրբեջանին։ Բացի այդ, Հայաստանը պետք է հրատապ միջոցներ ձեռնարկի վերջին 30 տարվա ընթացքում անհետացած գրեթե 4 հազար ադրբեջանցիների ճակատագրի, ինչպես նաև այն զանգվածային գերեզմանների վայրերի առնչությամբ, որտեղ ադրբեջանցիներ են թաղված են»,-ասվում է հայտարարության մեջ։
Հիշեցնենք, որ ՄԱԿ-ի Արդարադատության դատարանը 2023 թ-ի փետրվարին միաձայն քվեարկությամբ ամբողջությամբ մերժել էր Ադրբեջանի կողմից հրատապ միջոցներ ձեռնարկելու վերաբերյալ միջնորդությունը՝ հերքելով Հայաստանի կողմից Լեռնային Ղարաբաղում և հարակից տարածքներում ականներ տեղադրելու կեղծ մեղադրանքները։ Դատարանը հայտարարել էր, որ Ադրբեջանը չի ներկայացրել ապացույցներ, որոնք ցույց են տալիս, որ ականների հետ կապված Հայաստանի ենթադրյալ վարքագիծը «նպատակ ունի խաթարել էթնիկ ադրբեջանցիների իրավունքները»։
Հիշեցնենք, որ ՀՀ ԱԱԾ-ն երեկվա հայտարարությամբ հայտնել էր, որ ՀՀ-ն Ադրբեջանին կփոխանցի ականապատ դաշտերի քարտեզների վերաբերյալ 8 տեղեկամատյաններ։
Էմմա Չոբանյան
