29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Նյու Յորքում հանդիպել են Ֆրանսիայի և Իրանի ԱԳ նախարարները
Քաղաքականություն
24.01.2024 | 16:18
Նյու Յորքում ՄԱԿ-ի Անվտանգության խորհրդի նիստի շրջանակում հանդիպել են Իրանի ԱԳ նախարար Հոսեյն Ամիր Աբդոլահիանն ու Ֆրանսիայի ԱԳ նախարար Ստեֆան Սեժուրնեն։ Իրանի ԱԳՆ-ի փոխանցմամբ՝ Ֆրանսիայի դիվանագիտական ներկայացուցչությունում ֆրանսիացի բարձրաստիճան դիվանագետի խնդրանքով տեղի ունեցած հանդիպմանը կողմերը քննարկել են երկկողմ հարաբերություններին առնչվող իրավիճակը և փոխադարձ հետաքրքրություն ներկայացնող մի շարք այլ հարցեր։
Աբդոլահիանը դատապարտել է «Գազայի ժողովրդի դեմ Իսրայելի հանցագործությունները՝ ընդգծելով միջազգային հանրության կողմից ռազմական հանցագործությունները դադարեցնելու, անհապաղ զինադադար հաստատելու և պաղեստինցիների բռնի տեղահանմանը դիմակայելու լուրջ ջանքերի անհրաժեշտությունը»։
Նա ողջունել է Թեհրանի և Փարիզի միջև ընդհանուր շահերի և երկկողմ հարաբերությունների ամրապնդման ուղիների շուրջ բանակցությունների ու խորհրդակցությունների շարունակությունը։
Ֆրանսիայի ԱԳ նախարարն էլ խոսել է տարածաշրջանում խաղաղության ու կայունության պահպանման գործում «Իրանի դրական և կառուցողական դերի մասին և ընդգծել այնտեղ լարվածության աճը կանխելու անհրաժեշտությունը»։
Երկու երկրների ԱԳ նախարարները նաև ընդգծել են երկկողմ հարաբերությունների պահպանման և ընդլայնման անհրաժեշտությունը։
