03.06.2026 | 11:53
Էլեկտրատեխնիկայի վաճառքով զբաղվող ընկերության հարկային գործով պետությանը պատճառված 100 մլն դրամի վնասը վերականգնվել է
Գերմանիան Ուկրաինային առաջին անգամ ռազմական ուղղաթիռներ կմատակարարի
Քաղաքականություն
24.01.2024 | 13:48
Գերմանիայի կառավարությունը որոշել է առաջին անգամ Ուկրաինային սկսել ռազմական ուղղաթիռներ մատակարարել։ Ուկրաինայի ԶՈՒ-ն ստանալու է վեց բազմաֆունկցիոնալ Sea King Mk41 ուղղաթիռ և դրանց համար անհրաժեշտ սարքավորումներ և պահեստամասեր։ Այս մասին «Ռամշտայնի» ձևաչափով հանդիպման ավարտից հետո հայտարարել է Գերմանիայի Պաշտպանության նախարարությունը, գրում է DW-ի ռուսական ծառայությունը։
Բացի այդ, ուկրաինացի զինվորականներն անցնելու են անհրաժեշտ վերապատրաստում ինքնաթիռների շահագործման և պահպանման համար:
Գերմանիայի ՊՆ ղեկավար Բորիս Պիստորիուսի խոսքով՝ Sea King Mk41-ն «ապացուցված և հուսալի ուղղաթիռ է, որը կօգնի ուկրաինացիներին բազմաթիվ ոլորտներում՝ սկսած Սև ծովի հետախուզությունից մինչև զինվորների տեղափոխումը»:
«Սա Գերմանիայից այս տեսակի առաջին առաքումն է»,- ընդգծել է Պիստորիուսը:
Գերմանիայի ՊՆ-ի տվյալներով՝ Ուկրաինա ռուսական լայնամասշտաբ ներխուժման մեկնարկից հետո Բեռլինը Կիևին տրամադրել է շուրջ վեց միլիարդ եվրոյի ռազմական օգնություն։ Ավելի վաղ՝ 2023 թվականի սկզբին, այս մոդելի երկու ուղղաթիռներ Ուկրաինա էր տեղափոխել Մեծ Բրիտանիան։
Նույն օրն ավելի վաղ տեղի է ունեցել ԱՄՆ-ի հովանու ներքո ստեղծված Ուկրաինայի պաշտպանության կոնտակտային խմբի 18-րդ հանդիպումը (Ռամշտայնի ձևաչափ): Ուկրաինայի դաշնակիցները հավաստիացրել են հետագա ռազմական աջակցության, այդ թվում՝ հեռահար զենքի մատակարարումների հարցում, հայտարարել է Ուկրաինայի ՊՆ ներկայացուցիչ Իլարիոն Պավլյուկը։
Էմմա Չոբանյան
