Թրամփը հաղթել է նաև Նյու Հեմփշիրում ներկուսակցական ընտրություններում

Դոնալդ Թրամփը հաղթել է Նյու Հեմփշիրում հանրապետականների նախագահական փրայմերիզում։ VOA-ի փոխանցմամբ՝ այս մասին հայտնել է ձայների հաշվարկման կենտրոնը։

Թրամփը շարունակում է առաջատար դիրք զբաղեցնել կուսակցությունում՝ դեմոկրատ նախագահ Ջո Բայդենի հետ նոյեմբերին հնարավոր ռևանշի ճանապարհին։

Նրա միակ մրցակիցը՝ ՄԱԿ-ում ԱՄՆ նախկին դեսպան Նիկի Հեյլին, Կոնկորդում նախնական ընտրություններից հետո իր կողմնակիցներին հայտարարել է. «Այս մրցավազքը դեռևս չի ավարտվել»:

Հեյլին շնորհավորել է Թրամփին, սակայն հավելել է, որ կպայքարի, և հրավիրել է նրան բանավեճի։

Associated Press-ը հաղորդում է, որ քվեների 78%-ի հաշվարկով՝ Թրամփը հավաքել է ձայների գրեթե 55%-ը՝ Հեյլիի 43,5%-ի դիմաց, որը հույս ուներ, որ հյուսիսարևելյան նահանգում անկախ ընտրողների զգալի թիվը կօգնի իրեն ապահովել անակնկալ հաղթանակ, ինչը կարող էր թուլացնել Թրամփի վերահսկողությունը Հանրապետական կուսակցության նկատմամբ։

Քվեարկության արդյունքները ցույց են տալիս, որ Թրամփը գործնականում անհասանելի է դարձել իր մրցակցի համար։

Հավելենք, որ նոյեմբերին կայանալիք ԱՄՆ նախագահական ընտրություններում Հանրապետական կուսակցությունից թեկնածու դառնալու համար պայքարում էին Թրամփը, Ֆլորիդայի նահանգապետ Ռոն Դե Սանտիսը և Նիկի Հեյլին։

Ավելի վաղ, Նյու Հեմփշիրում կայանալիք հերթական փուլից առաջ Ռոն Դե Սանտիսը հայտարարեց, որ դուրս է գալիս ներկուսակցական պայքարից և իր աջակցությունը հայտնեց Թրամփին։