Մեր խնդիրն Ուկրաինայի հաղթանակն է ՌԴ-ի դեմ պատերազմում. Բորել

Ուկրաինան Եվրամիության համար առաջնահերթ է մնում։ Բրյուսելում ԵՄ արտաքին հարաբերությունների խորհրդի ավարտից հետո այս մասին ասել է կառույցի արտաքին և անվտանգության քաղաքականության հարցերով բարձր ներկայացուցիչ Ժոզեպ Բորելը, փոխանցում է DW-ի ռուսական ծառայությունը։

«Ուկրաինայի պատերազմը գոյաբանական սպառնալիք է Եվրոպայի համար, և մենք պատրաստ ենք օգնել Ուկրաինային։ Նպատակն այն է, որ Ուկրաինան հաղթի այս պատերազմում։ Սա մեր խնդիրն է»,- ասել է նա։

Վերջինը նաև տեղեկացրել է, որ փետրվարի առաջին կամ երկրորդ շաբաթվա ընթացքում կայցելի Կիև։

Բացի այդ, Ժոզեպ Բորելը հայտարարել է, որ ԵՄ երկրները քաղաքական համաձայնության են եկել ԵՄ-ում սառեցված ռուսական ակտիվներից շահույթի օգտագործման վերաբերյալ։

«Վստահ եմ, որ աշխատանքները մոտ ապագայում կավարտվեն, դեսպանների մակարդակով քննարկումները կշարունակվեն, բայց տեսնում եմ, որ համաձայնությունը մոտենում է»,- ասել է ԵՄ արտաքին քաղաքականության ղեկավարը՝ ընդգծելով, որ այդ որոշումը պետք է կայացվի մինչ փետրվարի 19-ը կայանալիք արտաքին հարաբերությունների խորհրդի հաջորդ նիստը:

Խոսքը Եվրահանձնաժողովի առաջարկի մասին է՝ գրանցել մեծ շահույթ սառեցված ռուսական ակտիվներից և պահել դրանք այնքան ժամանակ, մինչև ԵՄ-ն պատրաստ լինի այդ միջոցները փոխանցել Կիևին, ինչի համար առանձին մեխանիզմ պետք է մշակվի:

Բացի այդ, Բորելը հայտնել է, որ ոչ պաշտոնական փաստաթուղթ է ներկայացրել ԵՄ երկրներին՝ Ուկրաինային ռազմական օգնության հիմնադրամի ստեղծման առաջարկով։ Նա հույս է հայտնել, որ Եվրամիությունը համաձայնության կգա խաղաղության եվրոպական հիմնադրամը 5 միլիարդ եվրոյով համալրելու շուրջ՝ Ուկրաինային աջակցության հիմնադրամ ստեղծելու համար։