01.11.2024 | 23:19
Հրդեհ Գյումրու տներից մեկում
Երուսաղեմում ոստիկանությունը խուզարկություններ է անցկացրել «Կովերի պարտեզ» կոչվող տարածքում գտնվող հայերից մեկի տանը
Քաղաքականություն
22.01.2024 | 20:15
Այսօր Երուսաղեմում ոստիկանությունը խուզարկություններ է անցկացրել «Կովերի պարտեզ» կոչվող տարածքում գտնվող հայ համայնքի ներկայացուցիչներից մեկի տանը։ Այս մասին Factor.am-ի հետ զրույցում հայտնեց «Իսրայելահայեր» թերթի գլխավոր խմբագիր, Պետախ-Տիկվայի իսրայելահայերի «Նաիրի» միության նախագահ Արտյոմ Չերնամորյանը։
«Այսօր հրեական ոստիկանությունը խուզարկություններ է կազմակերպել բնակիչներից մեկի տանը։ Սադրանքներ տեղի չեն ունեցել։ Երուսաղեմի ոստիկանությունն է ներգրավված այս աշխատանքներում, որոնք չգիտես ինչու, ինչ հիմքով եկել և հայերի տանը խուզարկություն են կատարել»,- ասաց Չերնամորյանը։
Հիշեցնենք, որ Հայ առաքելական եկեղեցու Երուսաղեմի պատրիարքության առաջնորդ Նուրհան արքեպիսկոպոս Մանուկյանը ստորագրել է «Կովերի պարտեզի» տարածքը 99 տարով գործարար Դենիել Ռուբինշտեյնին վարձակալության հանձնելու մասին պայմանագիր՝ հյուրանոց կառուցելու համար։ Խոսքը հայկական համայնքի տարածքի ավելի քան 25% տարածքի մասին է և ներառում է «Կովերի պարտեզ» կոչվող տարածքն ամբողջությամբ։ Այս տարածքում բնակվում են նաև 5 ընտանիքներ։ Խոսքը նաև պատրիարքարանի հանդիսությունների շենքը քանդելու մասին է։
Տեղի հայ համայնքը բողոքի ցույցեր է անցկացնում և թույլ չի տալիս տարածքում շինարարության մեկնարկը։ Հայ համայնքի ներկայացուցիչներն անցյալ տարի երկու անգամ հարձակման են ենթարկվել քարերով, փայտերով ու ամրաններով զինված արաբների կողմից։
