Իսրայելի և ՀԱՄԱՍ-ի միջև բանակցությունները փակուղի են մտել Գազայում հրադադարի պահանջների պատճառով

Իսրայելի և պաղեստինյան ՀԱՄԱՍ շարժման միջև բանակցությունները Գազայի հատվածում պատանդների ազատ արձակման շուրջ դադարեցվել են զինյալների՝ մշտական հրադադարի պահանջի պատճառով։ Այս մասին հաղորդում է NBC News-ը՝ վկայակոչելով քննարկումներին ծանոթ դիվանագետին։

Հեռուստաալիքի տվյալներով՝ Գազայի հատվածում պահվող իսրայելցի պատանդներին ազատելու համար ՀԱՄԱՍ-ը պահանջում է ռազմական գործողությունների ամբողջական դադարեցում և իսրայելական զորքերի դուրսբերում անկլավի տարածքից։ Զինյալների պայմանները ներառում են նաև «մեծ թվով» պաղեստինցի բանտարկյալների ազատ արձակում, ներառյալ նրանց, ովքեր մասնակցել են 2023 թվականի հոկտեմբերի 7-ին Իսրայելի վրա հարձակմանը:

ՀԱՄԱՍ-ի անանուն պաշտոնյան NBC News-ին ասել է, որ խմբավորումը որևէ որոշում չի կայացնի այնքան ժամանակ, քանի դեռ խոստում չի ստացել, որ պատերազմը կավարտվի, և իսրայելական բոլոր զորքերը կլքեն Գազայի հատվածը։

«Սա է քննարկման էությունը»,- ընդգծել է հեռուստաալիքի զրուցակիցը։

Իսրայելի վարչապետ Բենիամին Նեթանյահուն հունվարի 21-ին կայացած մամուլի ասուլիսում հրապարակայնորեն մերժել է ՀԱՄԱՍ-ի պահանջները, նշում է NBC News-ը։

«Ես կտրականապես համաձայն չեմ ՀԱՄԱՍ-ի կապիտուլացման պայմաններին։ Եթե մենք ընդունենք դրանք, չենք կարող երաշխավորել մեր քաղաքացիների անվտանգությունը։ Մենք չենք կարողանա ապահով կերպով տարհանվածներին վերադարձնել իրենց տները, իսկ հաջորդ հոկտեմբերի 7-ը միայն ժամանակի հարց է լինելու»,- ասել է Նեթանյահուն։