ՀՀԿ-ն ու Դատախազությունն իրար վրա են գցում Քոչարյանի օգտին ստորագրած պատգամավորների անունները հրապարակելու ծանր բեռը

Ռոբերտ Քոչարյանի ազատության համար ստորագրած պատգամավորների անունները շարունակում են գաղտնի պահել։ Այդ անվանացանկը չի հրապարակում ո՛չ ստորագրահավաք նախաձեռնած կողմը՝ Հանրապետական կուսակցությունը, ո՛չ 2-րդ նախագահի պաշտպանությամբ զբաղվող փաստաբանների խումբը, ո՛չ այդ ցանկը ստացած Գլխավոր դատախազությունը։

Տպավորությունն այնպիսին է, որ այս երեք կողմերից յուրաքանչյուրը Քոչարյանի համար ստորագրած պատգամավորների անունները հանրայնացնելը գցում է մեկը մյուսի վրա։

Քոչարյանի պաշտպանները հայտնում են, որ ցուցակը ներկայացրել են Գլխավոր դատախազությանը, հետևաբար, անունները պետք է ճշտել այնտեղից։ Սլաքները դեպի Դատախազություն է ուղղում նաև ՀՀԿ-ն, երեկ մեզ հետ զրույցում Էդուարդ Շարմազանովը նշել էր․ «Դիմեք դատախազություն, Ձեզ կասեն»:

Սակայն, Factor.am-ի հետ զրույցում ՀՀ Գլխավոր դատախազության Հանրային կապերի բաժնի պետ Արևիկ Խաչատրյանը նշեց, որ Դատախազությունն իրավասու չէ հրապարակել Ռոբերտ Քոչարյանի խափանման միջոցը փոխելու համար ստորագրած պատգամավորների անունները․

«2-րդ նախագահի փաստաբանը միջնորդություն է ներկայացրել Դատախազություն, որին կից ներկայացվել է ստորագրահավաքի մասին փաստթաթուղթ, որը կցվել է միջնորդությանը։ Ցուցակը կարող է հրապարակել միայն ստորագրահավաքը նախաձեռնած կողմը»։

Իսկ ստորագրահավաքը նախաձեռնած կողմը՝ ՀՀԿ-ն շարունակում է գաղտնի պահել ցուցակի տակ ստորագրած իր պատգամավորների անունները։

Աղավնի Սուքիասյան