18.03.2026 | 12:25
Վրաստանում ազգային սուգ է հայտարարվել Իլյա 2-րդ պատրիարքի մահվան կապակցությամբ
Հութիներն Ադենի ծոցում հարվածներ են հասցրել ամերիկյան լցանավին
Քաղաքականություն
19.01.2024 | 11:57
Հութիներն Արաբական ծովի Ադենի ծոցում հարձակվել են ամերիկյան Chem Ranger տանկերի վրա։ Այս մասին հայտնում է տեղական Al Masirah հեռուստաալիքը՝ հղում անելով եմենցի զինվորականներին։ ԱՄՆ-ի կենտրոնական հրամանատարությունը (CENTCOM) հաստատել է հարձակումը՝ տեղեկացնելով, որ ոչ ոք չի տուժել:
Ծովային անվտանգության բրիտանական Ambrey ընկերությունը հայտնել է, որ չորս անօդաչու թռչող սարքեր մոտեցել են Մարշալյան կղզիների դրոշի ներքո նավարկող ամերիկյան լցանավին: Միջադեպը տեղի է ունեցել Եմենի Ալ Մուկալլա նավահանգստից 87 մղոն (140 կմ) հարավ-արևելք: Անօդաչու թռչող սարքերից մեկն ընկել է ծովը, հայտնում է Reuters-ը։
CENTCOM-ի տարածած մամուլի հաղորդագրությունում ասվում է, որ լցանավը հարձակման է ենթարկվել երեկ՝ հունվարի 18-ին, տեղական ժամանակով մոտավորապես 21:00-ին: Հութիները երկու հականավային բալիստիկ հրթիռ են արձակել, որոնք երկուսն էլ ընկել են ջուրը։ Նավին հասցված վնասի մասին տեղեկություններ չկան, այն շարունակել է ճանապարհը։
Հութիների կողմից Կարմիր ծովում միջազգային նավերի հրթիռակոծությունն ավելացել է դեկտեմբերին Իսրայելի և հութիների կողմից աջակցվող պաղեստինյան ՀԱՄԱՍ շարժման միջև պատերազմի ֆոնին:
Հունվարի 12-ին Միացյալ Նահանգները 2016 թվականից ի վեր առաջին անգամ հարվածներ հասցրեց հութիների դիրքերին։ Երեկ՝ հունվարի 18-ին, ամերիկացի զինվորականները հարվածներ են հասցրել հութիների հականավային հրթիռներին։ Չնայած դրան՝ շարժման առաջնորդը սպառնացել է շարունակել հարձակումները ամերիկյան և բրիտանական նավերի վրա։
