Թուրքիայի ԱԳ նախարարը հեռախոսազրույց է ունեցել Իրանի և Պակիստանի գործընկերների հետ ու զսպվածության կոչ արել

Թուրքիայի ԱԳ նախարար Հաքան Ֆիդանը հեռախոսազրույցներ  է ունեցել Պակիստանի ԱԳ նախարար Ջալիսլ Աբբաս Ջիլանիի ու Իրանի արտգործնախարար Հոսեյն Էմիր Աբդոլլահիանի հետ։

TRT Haber-ը, վկայակոչելով դիվանագիտական աղբյուրներին, հայտնում է, որ զրույցների ընթացքում Ֆիդանը նշել է, որ տարածաշրջանում նոր խնդիրներ չպետք է լինեն, և երկու կողմերին զսպվածության կոչ է արել։

Ջիլանին ու Աբդոլլահիանը հայտարարել են, որ չեն ցանկանում՝ լարվածությունը սրվի։

Մինչ այդ էլ, Իրաք-Իրան-Պակիստան հարաբերություններում վերջին զարգացումների կապակցությամբ Թուրքիայի ԱԳՆ-ն հայտարարություն էր տարածել։

«Մենք անհանգստացած ենք զարգացումներով, որոնք սկսվել են Իրաքում որոշակի թիրախների դեմ Իրանի հարձակումներով, այնուհետև ընդլայնվել են երեկ առավոտյան Պակիստանի ներսում որոշ թիրախների վրա Իրանի հարձակումներով և այսօր առավոտյան Իրանի տարածքում գտնվող թիրախների վրա Պակիստանի հարձակումներով»,- ասվում է հայտարարության մեջ։

Նշվում է, որ Անկարայի կարծիքով՝ խնդիրները պետք է լուծվեն բարեկամության և եղբայրության ըմբռնմամբ՝ հիմնված երկրների ինքնիշխանության և տարածքային ամբողջականության փոխադարձ հարգանքի վրա՝ միջազգային իրավունքի հիմնարար սկզբունքների, հատկապես ՄԱԿ-ի կանոնադրության շրջանակներում։

«Մենք հույս ունենք, որ բոլոր հարցերը կլուծվեն երկխոսության և համագործակցության միջոցով՝ առանց տարածաշրջանային անվտանգության և կայունության հետագա սպառնալիքների։ Մենք կոչ ենք անում բարեկամական և եղբայրական Իրանին, Իրաքին և Պակիստանին ապահովել խաղաղությունը չափավորության և ողջախոհության միջոցով»,- ասվում է հայտարարության մեջ։

Հիշեցնենք, որ Պակիստանն այսօր հրթիռային հարվածներ էր հասցրել Իրանին, որի հետևանքով, վերջին տվյալներով, կա 9 զոհ։

Էմմա Չոբանյան