ՀՀԿ-ականների ստորագրահավաքը Սերժ Սարգսյանի աջակցությունն է Ռոբերտ Քոչարյանին․ բոլոր «երևացող» դեմքերը ստորագել են

Այն արձագանքը, որը տվեց Հանրապետականը Ռոբերտ Քոչարյանի կալանավորմանը, շատերի համար սպասելի էր, քանի որ այդ կուսակցությունը Քոչարյանի նախագահության օրոք եղել է նրա քաղաքական գլխավոր հենարանը: Տրամաբանական է նաև համարել, որ ՀՀԿ հայտարարություններում արտահայտված են Սերժ Սարգսյանի գնահատականները: Սակայն ամեն դեպքում հետաքրքիր կլիներ լսել անձամբ Սերժ Սարգսյանի խոսքը`իր երկարամյա ամենասերտ քաղաքական դաշնակցի եւ գործընկերոջ կալանավորման հետ կապված: Factor.am-ի հարցին` հնարավո ՞ ր է Սերժ Սարգսյանը հարցազրույցի ձևաչափում հատուկ անդրադառնա այդ թեմային, Ազգային ժողովի փոխնախագահ, ՀՀԿ խոսնակ Էդուարդ Շարմազանովը պատասխանեց. «Երրորդ նախագահը մեր կուսակցության գործադիր մարմնի ղեկավարն է: Առանց կուսակցության ղեկավարի և ղեկավար մարմնի ներկայացուցիչների մասնակցության, որևէ կուսակցություն, այդ թվում` մերը, չի կարող ընդունել պաշտոնական հայտարարություն: ՀՀԿ-ի հայտարարությունները չեն կարող հակասության մեջ լինել կուսակցության նախագահի դիրքորոշման հետ»:

Ասել է թե՝ ՀՀԿ-ի աջակցությունը պետք է ընկալել նաեւ որպես Սերժ Սարգսյանի աջակցություն Ռոբերտ Քոչարյանին։

ԱԺ փոխնախագահը չհամաձայնեց, որ Քոչարյանին սատարող 40-ից ավելի պատգամավորների անունները գաղտնի են պահվում: Նա, մասնավորապես, նշեց. «Նախ` որևէ մեկի անունը գաղտնի չի պահվում, երկրորդ` Ձեր հարցի հասցեատերը ես չեմ, երրորրդ`դա արհեստական աժիոտաժ է: Դիմեք դատախազություն, Ձեզ կասեն: Որևէ մեկը թաքուն չի ստորագրել: Մեր խմբակցության ճնշող մեծամասնությունը ստորագրել է: Ի՞նչն է խնդիր: Բոլոր «երևացող» դեմքերը ստորագել են»:

ՀՀԿ մամուլի խոսնակն անդրադարձավ նաև 2008 թ․ մարտին ԱԱԽ քարտուղարի պաշտոնը զբաղեցրած Արմեն Գևորգյանին առաջադրված մեղադրանքի իրավաչափությանը` հայտարարելով. «Ոչ միայն իրավաչափ չէ, այլ նաև ծիծաղելի է: WikiLeaks-ի փաստաթղթի հիման վրա մեղադրում են նախկին փոխվարչապետին և նախագահի աշխատակազմի ղեկավարին: Այսօր պարզվեց, որ ՀՔԾ-ն կրկնակի ծիծաղելի վիճակի մեջ ընկավ, քանի որ ՍԴ անդամ Վալերի Պողոսյանը հայտնեց, որ Արմեն Գևոգյանն իրեն չի ճնշել: Պրոֆեսիոնալ չէ,երբ տպավորությունների հիման վրա գործ են հարուցում»:

Լեւոն Փանոսյան