23.07.2026 | 10:15
Յամալն ու Հոլանդը տրանսֆերային արժեքի ռեկորդ են սահմանել
ՌԴ ՊՆ-ն առաջին անգամ հայտնել է Լենինգրադի մարզում ԱԹՍ-ի խոցման մասին. Բելգորոդից հայտնել են 10 հրթիռների ոչնչացման մասին
Քաղաքականություն
18.01.2024 | 14:53
ՌԴ Պաշտպանության նախարարությունը հայտարարել է, որ հունվարի 18-ի գիշերը Լենինգրադի մարզում անօդաչու թռչող սարք է խոցվել։ Սա առաջին դեպքն է, երբ ՌԴ իշխանությունները հայտնում են, որ անօդաչու թռչող սարք է խոցվել այս շրջանում՝ Ուկրաինա լայնամասշտաբ ներխուժումից ի վեր, գրում է Մեդուզան։
Սանկտ Պետերբուրգի նահանգապետ Ալեքսանդր Բեգլովը հայտնել է, որ «ոչ ոք չի տուժել Լենինգրադի մարզում տեղի ունեցած միջադեպի պատճառով»։
«Քննչական գործողություններ են իրականացվում»,- հավելել է նա։
Բացի այդ, ՌԴ ՊՆ-ից հայտնել են, որ Մոսկվայի ժամանակով 1։30-ի սահմաններում ՀՕՊ ուժերն ԱԹՍ են խոցել Մոսկվայի մարզում։ Մոսկվայի քաղաքապետ Սերգեյ Սոբյանինը հայտարարել է, որ անօդաչուն խոցվել է Պոդոլսկի քաղաքային շրջանում։ Նախնական տվյալներով՝ ավերածություններ ու տուժածներ չկան։
Լենինգրադի մարզի իշխանությունները հարվածների հետևանքների մասին դեռևս չեն հաղորդում։
Հունվարի 17-ի երեկոյան ՊՆ-ն հայտնել է, որ հակաօդային պաշտպանության ուժերը Բրյանսկի շրջանի տարածքում ոչնչացրել են երկու «Տոչկա-Ու» հրթիռ և երեք անօդաչու թռչող սարք։ Ըստ նահանգապետ Ալեքսանդր Բոգոմազի՝ հարձակման հետևանքով ոչ ոք չի տուժել։ Վնասվել է մեկ բնակելի շենք, մասամբ վնասվել է արդյունաբերական ձեռնարկության տարածքում գտնվող շենքերից մեկի ապակեպատ հատվածը, հավելել է Բոգոմազը։
Բելգորոդի շրջանի ղեկավար Վյաչեսլավ Գլադկովն էլ հունվարի 18-ի առավոտյան հայտնել է, որ հակաօդային պաշտպանության ուժերը գիշերը տասը հրթիռ են խոցել։
«Կա մեկ տուժած․ կնոջ մոտ աջ ծնկային հոդի բեկորային վնասվածք է»,- գրել է Գլադկովը Telegram-ալիքում՝ հավելով, որ բժիշկները վիրավորին անհրաժեշտ օգնություն են ցուցաբերել։
