Քաղաքականություն
17.01.2024 | 21:27
Բայմակում բազմահազարանոց բողոքի ցույցերի մասնակիցների հանդեմ քրեական գործեր են հարուցել ՌԴ քրեական օրենսգրքի 212-րդ հոդվածով։ Այս մասին հայտնել է Բաշկորտոստանի հանրային խորհրդի ղեկավար Ռաֆայիլ Դիվաևը, փոխանցում է The Moscow Times-ը։
«Սա քրեական օրենսգրքի շատ լուրջ հոդված է՝ առանձնապես ծանր հոդվածներից։ Զանգվածային անկարգությունները սպառնալիք են երկրի ազգային անվտանգությանը, հետևաբար, այս հոդվածով նախատեսված պատիժը բավականին լուրջ է։ Ես ձեզ խորհուրդ եմ տալիս ուշքի գալ և չփչացնել ձեր կյանքը, մանավանդ, որ բոլոր վիճելի հարցերը կարող են լուծվել օրինական ճանապարհով»,- Դիվաևի խոսքերն է մեջբերում «Բաշինֆորմը»։
Ըստ ConsultantPlus համակարգի՝ ՌԴ քրեական օրենսգրքի 212-րդ հոդվածը «զանգվածային անկարգությունների» կազմակերպիչների համար նախատեսում է պատիժ՝ 8-ից 15 տարի ժամկետով ազատազրկման տեսքով: Դրանց մասնակիցներին սպառնում է ազատազրկում ուղղիչ գաղութներում՝ 3-ից 8 տարի ժամկետով:
Հիշեցնենք, որ Բաշկորտոստանում բողոքի ակցիաներ էին սկսվել ակտիվիստ Ֆաիլ Ալսինովի դատավճռի պատճառով, որը հունվարի 17-ին Բայմակ քաղաքի դատարանի կողմից մեղավոր է ճանաչվել ազգամիջյան ատելություն հրահրելու մեջ: Ալսինովը դատապարտվել է 4 տարի ժամկետով ազատազրկման ընդհանուր ռեժիմի գաղութում։
Ֆաիլ Ալսինովի դեմ գործը հարուցվել է Բաշկորտոստանի ղեկավար Ռադի Խաբիրովի պահանջով՝ 2023 թվականի ապրիլին բողոքի ցույցի ժամանակ ակտիվիստի ելույթի պատճառով։ Այն ժամանակ Ալսինովն բաշկիրերեն ասել էր «կարա խալիկ» արտահայտությունը, որը պայմանականորեն նշանակում է Ոսկե Հորդայի ֆեոդալներից կախված բնակչություն։ Նախաքննության ընթացքում անցկացված փորձաքննությունը որոշել է, որ այս արտահայտությունը համապատասխանում է «խաչի», «չուրկի», «թխամորթ» բառերի իմաստին։
