15.12.2025 | 21:13
Ալիևը համաներում է նախաձեռնում. այն կվերաբերի ավելի քան 20,000 մարդու
Էրդողանը հայտարարել է, որ Թուրքիան շարունակելու է Իրաքում և Սիրիայում գործողությունները
Քաղաքականություն
17.01.2024 | 19:09
Թուրքիայի նախագահ Ռեջեփ Թայիփ Էրդողանը խոսել է Իրաքում և Սիրիայում քուրդ զինյալների դեմ իրականացվող ռազմական գործողությունների մասին՝ նշելով, որ միայն «վերջին 5 օրվա ընթացքում Սիրիայում և Իրաքում Անկարայի օդային գործողությունների հետևանքով խոցվել է 114 թիրախ, վնասազերծվել՝ 78 ահաբեկիչ»։ Այս մասին գրում է Անադոլու գործակալությունը։
«Ահաբեկչությունն իր ակունքում ոչնչացնելու՝ Թուրքիայի վճռական ռազմավարությունը մեծագույն մտահոգություն է նրանց համար, որոնք ցանկանում են մեր տարածաշրջանում «տեռորիստան» ստեղծել: Մենք կանգ չենք առնելու այնքան ժամանակ, քանի դեռ չեն ոչնչացվել Սիրիայում ստոր նպատակներով ստեղծված ահաբեկիչների բոլոր բները՝ Թել Ռիֆաթից մինչև Այնուլարաբ, Հասեքիից մինչև Մունբիջ»,- ասել է Էրդողանը։
Թուրքիայի ղեկավարը հավելել է, որ երկրի ԶՈՒ գործողությունները Սիրիայում ու Իրաքում անհանգստացնում են որոշ ուժերի․ «Դա խախտել է նրանց հաշվարկները, որոնք պարբերաբար փոխում են օրակարգի քարտեզները, նաև նրանց, որոնք մեր տարածաշրջանին նոր Սևր են պարտադրում»։
Էրդողանը հավելել է, որ գործողությունները շարունակվելու են Սիրիայում ու Իրաքում․ «Եթե մեզ տված խոստումները չկատարվեն, ապա ոչ ոք չի կարող առարկել, որ Թուրքիան անհրաժեշտ միջոցներ ձեռնարկի սեփական անվտանգությունն ապահովելու համար»։
Հիշեցնենք, որ հունվարի 12-ին Հյուսիսային Իրաքում PKK-ի հետ բախումների ընթացքում սպանվել էր 9 թուրք զինծառայող, որից հետո Թուրքիան ակտիվացրել է գործողություններն ու ավիահարվածներ է հասցնում Սիրիայում և Իրաքում քրդական թիրախներին ու քաղաքացիական ենթակառուցվածքներին։
Էմմա Չոբանյան
