Իսրայելն ավարտում է Գազայում ռազմական գործողությունների ինտենսիվ փուլը

Իսրայելը հայտարարել է, որ պաշտպանության բանակն ավարտում է Գազայում ինտենսիվ ցամաքային գործողությունը՝ իր վերահսկողության տակ առնելով հյուսիսային հատվածը։ Այս մասին հայտարարել է երկրի պաշտպանության նախարար Յոավ Գալանտը, գրում է Euronews-ը։

Նա նշել է, որ զինվորականները շուտով վերահսկելու են Գազայի հարավային հատվածը։

Իսրայելցի պաշտոնյայի ճեպազրույցը տեղի է ունեցել այն բանից հետո, երբ ՀԱՄԱՍ-ը հայտարարել էր, որ երկու իսրայելցի պատանդներ, իբր, մահացել են իսրայելական հրետակոծության հետևանքով։ Գալանտը շարունակել է արդարացնել Իսրայելի ռազմավարությունը Գազայի հատվածում։

«Եթե կրակը դադարի, ՀԱՄԱՍ-ի մոտ գտնվող պատանդների ճակատագիրը տարիներով կկանխորոշվի։ Առանց ռազմական ճնշման մեզ հետ ոչ ոք չի խոսի, առանց ռազմական ճնշման մենք չենք կարողանա որևէ համաձայնության գալ: Միայն ուժի դիրքերից կարելի է ազատ արձակել առևանգվածներին»,- ասել է նա։

Հրապարակման համաձայն՝ Բուրեյջ փախստականների ճամբարը գործնականում ավերվել է իսրայելական զորքերի դուրսբերումից հետո: ՄԱԿ-ը շարունակում է դժգոհել, որ իր անձնակազմին դեկտեմբերի վերջից մի քանի անգամ մերժել են մուտք գործել Գազայի հյուսիսային հատված՝ դեղորայք, վառելիք, ջուր և սանիտարա-տեխնիկական սարքավորումներ մատակարարելու համար:

«Թեպետ ձեռնարկվել են որոշ քայլեր Գազա հումանիտար օգնության ավելացման ուղղությամբ, փրկարար օգնությունը չի հասնում մարդկանց, որոնք ամիսներ շարունակ հանդուրժել են անողոք հարձակումները, նույնիսկ այն մասշտաբով, որն անհրաժեշտ է»,- հայտարարել է ՄԱԿ-ի գլխավոր քարտուղար Անտոնիո Գուտերեշը։

Հաղորդվում է, որ Գազայի բնակչության շուրջ 85 տոկոսը՝ գրեթե 2 մլն մարդ, ստիպված է եղել լքել տները։

Էմմա Չոբանյան