24.06.2026 | 15:44
Փաշինյանն ու Մոդին կարևորել են բարձր մակարդակի փոխայցելությունների կազմակերպումը
«Ուզում էի հարվածել զրուցակցիս դեմքին»․ Ուկրաինայի ԱԳՆ ղեկավարը՝ Լավրովի հետ բանակցությունների մասին
Քաղաքականություն
16.01.2024 | 11:40
Ուկրաինայի արտաքին գործերի նախարար Դմիտրի Կուլեբան խոստովանել է, որ 2022 թվականի գարնանը ՌԴ ԱԳ նախարար Սերգեյ Լավրովի հետ բանակցությունների ժամանակ ցանկացել է հարվածել իր զրուցակցին։ Այս մասին Կուլեբան խոսել է ուկրաինացի լրագրող Ռոման Բեբեկին տված հարցազրույցում։
«Ամենածանր բանակցություններն այն բանակցություններն են, որոնց ժամանակ ցանկանում ես կանգնել ու դեմքին հարվածել, բայց դու դա չես կարող քեզ թույլ տալ։ Եվ այդպիսի բանակցություններ 2-3 անգամ հաստատ ունեցել եմ»,- ասել է Ուկրաինայի ԱԳՆ ղեկավարը։
Կուլեբան պարզաբանել է, որ նման դեպքերից մեկը տեղի է ունեցել 2022 թվականի մարտին Անթալիայում՝ ուկրաինական տարածք ռուսական զորքերի լայնամասշտաբ ներխուժումն սկսելուց անմիջապես հետո։ Այդ հանդիպումը կայացել էր Թուրքիայի արտգործնախարար Մևլութ Չավուշօղլուի միջնորդությամբ։ Reuters-ը հիշեցնում է, որ այդ ժամանակ Կուլեբան հայտարարել էր՝ բանակցությունները նվիրված են եղել հրադադարի հնարավորությանը և մարդասիրական միջանցքների ստեղծմանը։ Հանդիպումն ավարտվել էր առանց պայմանավորվածությունների։
ՌԴ ԱԳՆ մամուլի խոսնակ Մարիա Զախարովան «Իզվեստիային» տված հարցազրույցի ժամանակ անդրադարձել է Կուլեբայի հայտարարությանը։
«Անկիրթ, ագրեսիվ մարդիկ են հավաքագրվել նախարարների անվան տակ, որպեսզի կործանեն Ուկրաինան ամերիկյան փողերով»,- ասել է նա:
