Իրանը հրթիռային հարվածներ է հասցրել Սիրիայի ու Իրաքի տարածքներում

Իրանի Իսլամական հեղափոխության պահապանների կորպուսը (ԻՀՊԿ) հարվածներ է հասցրել Իրաքում և Սիրիայում «լրտեսական կենտրոններին» և «հակաիրանական ահաբեկչական խմբավորումների վայրերին»։ Այս մասին հայտնել են Իրանի պետական ​​լրատվամիջոցները, փոխանցում է DW-ի ռուսական ծառայությունը։ Հաղորդվում է, որ բալիստիկ հրթիռների օգնությամբ հարված է հասցվել Իրաքյան Քուրդիստանի ինքնավար շրջանում գտնվող «Մոսադի լրտեսների» (Իսրայելական հետախուզական ծառայություն) կենտրոնակայանին։

Reuters-ը հայտում է, որ միաժամանակ  մի քանի պայթյուն է որոտացել ԱՄՆ հյուպատոսարանի մոտ՝ Իրաքյան Քուրդիստանի մայրաքաղաք Էրբիլից 40 կմ հյուսիս-արևելք։ Ինքնավար շրջանի իշխանությունները հայտնում են, որ 4 բնակիչ է սպանվել, 6-ը՝ վիրավորվել։ Զոհերի թվում է քուրդ գործարար, միլիարդատեր Փեշրավ Դիզայը ու նրա ընտանիքի մի քանի անդամները։  Բացի այդ, հրթիռներից մեկն ընկել է քրդական հետախուզության  բարձրաստիճան սպայի, մյուսն էլ՝ քրդական հատուկ ծառայությունների կենտրոնի վրա։ ԱՄՆ-ի պաշտոնյաները հայտնել են, որ Իրանի հարվածի հետևանքով ոչ մի ամերիկացի չի տուժել:

Էրբիլի օդանավակայանը դադարեցրել է աշխատանքը։ Իսլամական հեղափոխության պահապանների կորպուսը, ըստ իրանական լրատվամիջոցների, Սիրիայում էլ հարձակվել է Իդլիբ նահանգում  ԻԼԻՊ-ի թիրախների վրա։ Թեհրանից հայտարարում են, որ այս հարվածները հասցվել են ի պատասխան հունվարի 3-ի «ահաբեկչական հարձակման», երբ Քերման քաղաքի գերեզմանոցում պայթյուններ տեղի ունեցան Իսլամական հեղափոխության պահապանների կորպուսի գեներալ Ղասեմ Սոլեյմանիի հիշատակին նվիրված արարողության ժամանակ։ Զոհվեց ավելի քան 90 մարդ։ Ահաբեկչության պատասխանատվությունը ստանձնել էր ԻԼԻՊ-ը։

Dpa գործակալությունը նշում է, որ Իրանը մինչ այժմ երբեք իր հրթիռները այս հեռավորությունից չէր արձակել։ Նշվում է, որ դրանք կարողացել են թռչել ավելի քան 1200 կիլոմետր։ Գործակալությունը գրում է, որ սա հստակ ուղերձ է այն մասին, որ Թեհրանն ունի տեխնիկական հնարավորություն նաև Իսրայելի տարածքին հարվածելու։