23.07.2026 | 10:44
Ռուբիոն ու Լավրովը 35 րոպեանոց հանդիպում են անցկացրել Մանիլայում․ ինչ հարցեր են քննարկվել
Հանգուցյալ Եղիսաբեթ II-ի քարտուղարն առաջին անգամ բացահայտել է թագուհու մահվան մանրամասները
Քաղաքականություն
15.01.2024 | 16:15
Մեծ Բրիտանիայի Եղիսաբեթ II թագուհին մահացել է քնած ժամանակ։ Այս մասին հայտնել է նրա քարտուղար Էդվարդ Յանգը, հայտնում է Daily Mail-ը։
Իր գրառումներում նա, մասնավորապես, նշել է, որ թագուհին «մահացել է շատ խաղաղ»։ Այս գրառումները ներկայում պահվում են Թագավորական արխիվում։
«Շատ խաղաղ: Քնի մեջ: Հեռացել է: Ծերություն: Նա չի գիտակցել, թե ինչ է կատարվում: Ոչ մի ցավ»,- գրել է Էդվարդ Յանգը:
Պալատական գրող Ռոբերտ Հարդմանը ներկայիս միապետի նոր կենսագրականում՝ «Չարլզ III․ նոր թագավոր, նոր պալատ։ Պատմություն ներսից»-ում, կիսվում է, որ սըր Էդվարդի գրությունից կարճ ժամանակ անց սպասավորը բերել է փաստաթղթերով փակված կարմիր տուփ, որը եղել է թագուհու մոտ։ Դրանում գտել են երկու կնքված նամակ, մեկը՝ ուղղված իր որդուն և ժառանգին՝ ներկայիս՝ թագավոր Չարլզ III-ին, իսկ մյուսը՝ սըր Էդվարդին։
Թեև դրանց բովանդակությունը հազիվ թե երբևէ հրապարակվի, նամակների առկայությունը հուշում է, որ 96-ամյա Եղիսաբեթը հանգիստ ընդունել է, որ իր ժամանակն այս երկրի վրա մոտենում է ավարտին:
Տուփում եղել են նաև Եղիսաբեթ II-ի վերջին փաստաթղթերը և թագավորական հրամանը՝ «Բացառիկ վաստակաշատ ծառայության» համար հեղինակավոր «Արժանիքների» շքանշանի թեկնածուներ ընտրելու մասին:
«Նույնիսկ մահվան մահճում նա գործ ուներ անելու: Եվ նա արեց դա»,- գրել է Հարդմանը հանգուցյալ թագուհու անզուգական նվիրվածության մասին:
Արքայադուստր Աննան ավելի վաղ հայտնել էր, որ Եղիսաբեթ թագուհին անհանգստացած է, որ դժվար կլինի կազմակերպել իր հուղարկավորությունը, եթե նա մահանա Բալմորալում:
