15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Գերմանիան պատրաստվում է 2025թ․ ամռանը ՆԱՏՕ-ի հետ Ռուսաստանի հնարավոր պատերազմին․ Bild
Քաղաքականություն
15.01.2024 | 12:38
Գերմանիայի Պաշտպանության նախարարությունը ՆԱՏՕ-ի և Ռուսաստանի միջև հնարավոր պատերազմի սցենար է մշակել, որը կարող է սկսվել 2025 թվականի ամռանը։ Այս մասին գրում է Bild-ը՝ վկայակոչելով իր տրամադրության տակ հայտնված փաստաթուղթը։ Նախարարությունը կանխատեսում է իրավիճակի սրացում արդեն այս տարվա փետրվարին։
Ըստ պարբերականի՝ ռազմական գերատեսչությունը մշակել է վերապատրաստման սցենար, որը «քայլ առ քայլ, ամիս առ ամիս» նկարագրում է, թե ինչպես է նախագահ Վլադիմիր Պուտինը գործելու և ինչպես է ՆԱՏՕ-ն նախատեսում պաշտպանվել հիպոթետիկ ագրեսիայի դեպքում։
«Դաշինքի պաշտպանություն 2025» կոչվող սցենարը սկսվում է 2024 թվականի փետրվարին, երբ Ռուսաստանը նոր մոբիլիզացիա է իրականացնում և բանակ է կանչում 200 հազար մարդու։ Այնուհետև ռուսական ուժերը գարնանային հարձակում են սկսում Ուկրաինայում և հետ մղում ուկրաինական բանակը մինչև հունիս:
Արևմուտքի դեմ կիբերհարձակումները և հիբրիդային պատերազմի այլ ձևերը սկսվում են հուլիսին: Բախումներ են սկսվում Բալթյան երկրներում, որոնք Ռուսաստանն օգտագործում է որպես պատրվակ իր տարածքում և Բելառուսում լայնածավալ զորավարժություններ սկսելու համար։ Հոկտեմբերին Ռուսաստանը զորքեր և միջին հեռահարության հրթիռներ է տեղափոխում Կալինինգրադ։
2024 թվականի դեկտեմբերից Բելառուսի և Կալինինգրադի շրջանի Սուվալկի միջանցքի տարածքում «սահմանային հակամարտություն» է տեղի ունենում։ Այնուհետև, օգտվելով ԱՄՆ նախագահական ընտրություններից հետո ժամանակավոր անարխիայից, Ռուսաստանը Բելառուսի աջակցությամբ «կրկնում է 2014 թվականի ներխուժումը ՆԱՏՕ-ի տարածք»։
Նկարագրված սցենարով Ռուսաստանի և ՆԱՏՕ-ի միջև պատերազմը կարող է սկսվել 2025 թվականի ամռանը։ 2025-ի մայիսին դաշինքի ղեկավարությունը որոշում է կայացնելու զսպման միջոցների մասին։
«X օրը, համաձայն Բունդեսվերի գաղտնի փաստաթղթի, ՆԱՏՕ-ի գլխավոր հրամանատարը հրաման կտա 300 հազար զինվոր տեղափոխել արևելյան թև, այդ թվում՝ 30 հազար Բունդեսվերի զինվորների»,- ասվում է հրապարակման մեջ։
Սցենարն ավարտվում է «X օրից» 30 օր հետո: Կոնկրետ ինչպե՞ս կավարտվի այս հակամարտությունը՝ գերմանացի զինվորականները չեն հստակեցնում։
Դեկտեմբերի վերջին հոլանդական բանակի հրամանատար Մարտին Վիժենը հայտարարել էր Ռուսաստանի հետ պատերազմի սպառնալիքի մասին։ Ուկրաինայի նախագահ Վլադիմիր Զելենսկին խոսել է 2024 թվականին հարձակումը շարունակելու՝ ուկրաինական զինված ուժերի պլանների մասին։ Նա զինվորականների գլխավոր նպատակն է անվանել Ղրիմի մեկուսացումը։
Ուկրաինայի իշխանությունները հրաժարվում են համաձայնել ռազմական հակամարտությունը սառեցնելուն։
