Ռուս երիտասարդության գրեթե կեսը հրաժարվում է քվեարկել Պուտինի օգտին. հարցում

Ռուսաստանի նախագահ Վլադիմիր Պուտինը չի վայելում մինչև 30 տարեկան ռուսաստանցիների անվերապահ աջակցությունը։ Այս մասին են վկայում Չիկագոյի համալսարանին առընթեր NORC կենտրոնի անցկացրած հարցման արդյունքները։ Այս տարիքի քաղաքացիների միայն 53%-ն է պատրաստ քվեարկել պետության ներկայիս ղեկավարի օգտին, որը պատրաստվում է առաջադրվել հինգերորդ ժամկետի համար, իսկ 47%-ը կնախընտրեր այլ թեկնածուի, փոխանցում է The Moscow Times-ը։

Պուտինի ամենաակտիվ կողմնակիցները 60 տարեկանից բարձր ռուսներն են։ Նրանց 73%-ը նախատեսում է մարտին կայանալիք ընտրություններում աջակցել նախագահին։ Ընդհանուր առմամբ, երկրի բնակչության երկու երրորդը պատրաստվում է քվեարկել Պուտինի օգտին, միաժամանակ, նրա թեկնածությունն ավելի հաճախ պաշտպանում են կանայք (70%), քան տղամարդիկ (61%)։

Բացի այդ, Ռուսաստանում քաղաքական դաշտը փոխելու պահանջ կա։ Այսպես, հարցվածների 74%-ն ասել է, որ երկրում պետք է ընդդիմություն լինի գործող իշխանությանը։ Սակայն, չնայած մեծամասնությունը կողմ է փոփոխությանը, դրա հրատապության վերաբերյալ կարծիքները տարբեր են. 42%-ը կարծում է, որ դրա ժամանակն արդեն եկել է, 46%-ը՝ հակառակը։

Ռուսներին հարցրել են նաև, թե ինչպես են վերաբերվում ուկրաինական պատերազմին, որը սկսել է Պուտինը և որը շարունակվում է արդեն մոտ երկու տարի։ Ինչպես պարզվել է՝ նրան աջակցում է քաղաքացիների 63%-ը։ Հիմնականում հարցվածներն իրենց դիրքորոշումը հիմնավորել են «ՆԱՏՕ-ի սպառնալիքներով»։