Քաղաքականություն
11.01.2024 | 19:41
Իրանի ռազմածովային ուժերը հայտնել են Օմանի ծոցի ջրերում ամերիկյան նավթատար լցանավ կալանելու մասին, հայտնում է Tasnim-ը։
Կալանումն իրականացվել է դատարանի որոշման կատարման շրջանակում, պարզաբանել են Իրանի ռազմածովային ուժերը։ Լցանավը ԱՄՆ-ն առգրավել էր 2023 թվականի սեպտեմբերին հունական Empire Navigation նավատորմային ընկերությունից՝ պատժամիջոցների խախտմամբ իրանական նավթ տեղափոխելու համար։
Empire Navigation-ի ծովային առևտրի համակարգման կենտրոնն այսօր հայտնել է, որ Օմանի ծոցում նավ են բարձրացել մի քանի զինված մարդիկ՝ Սոհար քաղաքից 50 ծովային մղոն դեպի արևելք: Լցանավի հետ կապը կորել է։ Լցանավում 19 մարդ է եղել, հաղորդում է հունական Efimerida ton Sindakton թերթը։
Reuters-ի փոխանցմամբ՝ խոսքը St. Nikolas լցանավի մասին է, որը պատկանում է Empire Navigation-ին: Գործակալության տվյալներով՝ այն իրաքյան նավթը Բասրայից Թուրքիա է տեղափոխել Սուեզի ջրանցքով։ Նավը վարձակալել է թուրքական Tupras ընկերությունը։
Al Jazeera-ն իր հերթին հայտնել է, որ նավը նախկինում անվանվել է Suez Rajan: 2022 թվականին ԱՄՆ Արդարադատության նախարարությունը հայտարարել էր, որ լցանավն իրանական հում նավթ է տեղափոխում Պարսից ծոցի Խարկ կղզուց՝ շրջանցելով պատժամիջոցները։ Գերատեսչությունն առգրավել է 1 միլիոն բարել նավթ, որը փոխադրել է Suez Rajan-ը, ինչպես նաև բուն նավը։
