Հաղորդաշարեր
13.01.2024 | 19:02«Մենք շատ ենք կապված անցյալի հետ, վախենում ենք նոր կյանք ապրելուց, մեզանում կա նոստալգիա, անցյալի պաշտամունք, մինչդեռ մենք չպետք է ապրենք անցյալի մեջ, այլ անցյալը պետք է ապրի մեր մեջ»,- Factor TV-ի հետ զրույցում նշում է բանաստեղծ, թարգմանիչ և գրականագետ Հենրիկ Էդոյանը՝ հավելելով, որ մեր ժողովրդին պետք է ժամանակակից քաղաքային մտածողություն, և մեր արվեստը պետք է դաստիարակի քաղաքային մարդու:
Նա անդրադառնում է նաև Արցախի կորստին՝ դա որակելով դա աղետ. «Ներքին ինտելեկտուալ լարում է պետք`հասկանալու, թե մեզ հետ ինչ տեղի ունեցավ: Մենք «ջունգլիներից» պետք է դուրս գանք: Մեր ինտելեկտուալ ցածր մակարդակը, մտածողության կորուստը հավասար է Արցախի կորստին: Մեր ժողովրդի մեջ մեծ ուժ, պոտենցիալ կա, բայց անհրաժեշտ է, որ ազատվենք կեղծ արժեքներից ու պաթոսից»:
Խոսելով արվեստի, գրականության մասին՝ Հենրիկ Էդոյանը նկատում է, որ գրականությունը մեզանում և աշխարհում որևէ ազդեցություն չունի հասարակական կյանքի վրա։
«Այն օրակարգ չի թելադրում: Մշակույթը, կուլտուրան անհատական պլանով են աշխատում: Մեզ մոտ մարդիկ իրար չեն հանդուրժում, մարդկային զգացմունքները նահանջ են ապրել, դա հոգևոր մեծ անկում է: Ամենուր մատերիալիզմ է ու մերկանտիլիզմ»,- ասում է նա:
Հենրիկ Էդոյանն անդրադառնում է նաև հայկական մեդիայով հրամցվող երաժշտությանն ու սերիալներին. «Ռաբիսը մեզանում դարձել է կենսակերպ, սիրային երգ են երգում՝ զզվելդ գալիս է: Ճաշակի սոսկալի անկում կա: Սերիալներն էլ սարսափելի են. այնտեղ մարդիկ անընդհատ իրար վրա գոռում են, ինչպե՞ս կարելի է այդքան պրիմիտիվ ու էժանագին լինել»:
Մանրամասները`տեսանյութում:
Աննա Բաբաջանյան
