23.06.2026 | 18:10
Ուրսուլա ֆոն դեր Լեյենը Հայաստան կայցելի // ՌԴ-ում բենզինի վաճառքի սահմանափակումներ են․ ԼՈՒՐԵՐ
Գազայի հատվածում բնակելի շենքին հարվածը տասնյակ մարդկանց կյանքեր է խլել․ Իսրայելը սպառնում է նաև Լիբանանին
Քաղաքականություն
11.01.2024 | 17:58
Առնվազն 20 մարդ է զոհվել, տասնյակ մարդիկ վիրավորվել են Գազայի կենտրոնական Դեյր ալ-Բալում՝ Ալ-Աքսա հիվանդանոցի մոտ գտնվող երկհարկանի բնակելի շենքին իսրայելական հարձակման հետևանքով։ Ըստ վերջին տվյալների՝ Գազայի հատվածում ՀԱՄԱՍ-ի զինյալների դեմ իսրայելական բանակի ռազմական գործողությունները կենտրոնացած են հարավային Խան Յունիս քաղաքում և կենտրոնական շրջաններում գտնվող փախստականների ճամբարներում, գրում է Euronews-ը։
Լիբանանի հետ սահմանին սրման ֆոնին, որի տարածքից «Հըզբոլլահ» խմբավորումը հարձակումներ է իրականացնում Իսրայելի վրա, Իսրայելի պաշտպանության բանակի գլխավոր շտաբի պետ Հերզի Հա-Լևին հայտարարել է, որ Գազայի հատվածում զինվորականների փորձը, անհրաժեշտության դեպքում, կարող է կիրառվել նաև Լիբանանում։
«Գազայում ոչ մի քառակուսի կիլոմետր չկա, որ դուք չիմանաք՝ ինչպես մտնել և ոչնչացնել այն, ձեր արածից հետո նման հասկացություն գոյություն չունի։ Ձեր արածից հետո Լիբանանում մի գյուղ չկա, ուր դուք չկարողանաք մտնել և ոչնչացնել»,- ասել է նա Գազայի հատված այցելության ժամանակ զինվորների հետ խոսելիս:
Հինգշաբթի Հաագայի Միջազգային դատարանը սկսել է քննարկել Հարաֆրիկյան Հանրապետության հայցն ընդդեմ Իսրայելի՝ Գազայի հատվածում ցեղասպանության և ռազմական հանցագործությունների մեղադրանքով։ ՀԱՄԱՍ-ը հայցն անվանել է «պատմական»:
