Քաղաքականություն
11.01.2024 | 11:28
Ադրբեջանի նախագահ Իլհամ Ալիևը տեղական հեռուստաընկերություններին տված հարցազրույցում հայտարարել է, որ Բաքուն շարունակելու է գործել Փարիզի դեմ։ Նա հերթական անգամ դժգոհել է Հայաստանի ու Ֆրանսիայի ռազմատեխնիկական համագործակցությունից։
«Ֆրանսիան երկիր է, որն այսօր զինում է Հայաստանին, հուսադրում, ուսուցանում նրա զինծառայողերին և նախապատրաստում հերթական պատերազմին։ Հետևաբար՝ երբ ես ասում էի, որ Ֆրանսիայի քաղաքականությունը նպաստում է Կովկասում լարվածության սրմանը, սա հենց այն է, ինչ նկատի ունեի»։
Ադրբեջանի նախագահը նաև հայտարարել է, որ Բաքուն շարունակելու է Փարիզի դեմ գործել՝ նպաստելով «ֆրանսիական գաղութների ազատագրմանը Ֆրանսիայի լծից»։
«Մենք ավարտում ենք Չմիավորման շարժման կազմակերպությունում մեր նախագահությունը, բայց Բաքվի նախաձեռնող խումբը կշարունակի գործել: Մենք կնպաստենք ֆրանսիական նեոգաղութատիրության բացահայտմանը և լծից ֆրանսիական գաղութների ազատագրման գործընթացին»,-ասել է Ադրբեջանի ղեկավարը։
«Մենք բացահայտեցինք Ֆրանսիայի իրական դեմքը, բոլորը մինչ այժմ լռում էին, վախենում էին խնդիրներից, մենք չենք վախենում և ես կարծում եմ, որ այն ինչ տեղի է ունենում այսօր՝ ՄԱԿ-ի ԱԽ-ում ու ԵՄ-ում ֆիասկոն, Եվրախորհրդարանում իրենց ներկայացուցիչների միջոցով մեզ ճնշելու փորձերը, այդ ամենն անօգուտ է։ Մենք, իհարկե, շարունակելու ենք» ,- հայտարարել է Ալիևը։
