Լիտվայի նախագահը Զելենսկիի հետ բանակցություններից հետո հայտարարել է Ուկրաինային ռազմական օգնություն տրամադրելու մասին

Լիտվայի նախագահ Գիտանաս Նաուսեդան հայտարարել է Ուկրաինային ռազմական օգնության նոր մատակարարումների մասին Բալթյան երկրներ շրջագայության մեջ գտնվող Ուկրաինայի նախագահ Վլադիմիր Զելենսկիի հետ հանդիպումից հետո, փոխանցում է BBC-ի ռուսական ծառայությունը։

«Մենք հաստատել ենք Ուկրաինային 200 միլիոն եվրոյի երկարաժամկետ ռազմական օգնության փաթեթը։ Հունվարին կրկին զինամթերք, գեներատորներ, պայթեցման համակարգեր կուղարկենք Ուկրաինա, իսկ փետրվարին՝ M5777 զրահափոխադրիչներ։ Մենք կպատրաստենք ուկրաինացի զինվորներին և կամրապնդենք համագործակցությունը պաշտպանական արդյունաբերության ոլորտում»,- ասել է Նաուսեդան համատեղ մամուլի ասուլիսում։

«Այսօր Գիտանաս Նաուսեդայի հետ մեծ ուշադրություն դարձրինք, թե ինչպես են իրադարձությունները զարգանում ճակատում: Զենք, տեխնիկա, մեր զինվորների ուսուցում, ականազերծման կոալիցիայում Լիտվայի առաջատար դերակատարությունը․․․ այս ամենը մեզ ուժ է տալիս։ Շնորհակալություն նոր ռազմական աջակցության համար, որի շուրջ այժմ պայմանավորվել ենք՝ ոչ միայն օգնության, այլ համատեղ արտադրության, մասնավորապես, հակաօդային սարքավորման համար, որը չափազանց անհրաժեշտ է ճակատում»,- ասվում է Զելենսկիի Telegram-ալիքում գրառման մեջ։

Մերձբալթյան երկրները՝ նախկին խորհրդային հանրապետությունները, որոնք այժմ ԵՄ-ի և ՆԱՏՕ-ի մաս են կազմում, դարձել են Ուկրաինայի ամենահավատարիմ դաշնակիցներից մեկը՝ Ռուսաստանի ներխուժումից հետո:

Հաշվի առնելով ձգձգվող պատերազմի աճող հավանականությունը՝ Ուկրաինան ստիպված է դիմել իր արևմտյան դաշնակիցներին՝ լրացուցիչ ֆինանսական և ռազմական օգնության համար, նշում է Reuters-ը։