Բլինքենն Աբասի հետ քննարկել է Գազայում քաղաքացիական վնասները նվազագույնի հասցնելու ջանքերը

ԱՄՆ պետքարտուղար Էնթոնի Բլինքենը Պաղեստինի ինքնավարության նախագահ Մահմուդ Աբասի հետ հանդիպման ժամանակ քննարկել է «քաղաքացիական բնակչության վնասը նվազագույնի հասցնելու շարունակական ջանքերը» և Գազայի հատվածում մարդասիրական օգնության մատակարարման մեծացումը։ Այս մասին հայտնել է ԱՄՆ Պետքարտուղարությունը, որին վկայակոչում է CNN-ը։

Բլինքենն Աբասի հետ հանդիպել է այսօր Արևմտյան ափում՝ Մերձավոր Արևելք կատարած մեկշաբաթյա ուղևորության ընթացքում, որի նպատակն է թուլացնել տարածաշրջանային լարվածությունը:

Ըստ Պետքարտուղարության խոսնակ Մեթյու Միլլերի հայտարարության՝ ՄԱԿ-ը Սիգրիդ Կաագին նշանակել է Գազայի հումանիտար և վերակառուցման հարցերով ավագ համակարգող, որպես քաղաքացիական անձանց վնասը նվազեցնելու ջանքերի մի մաս:

Բլինքենը նաև քննարկել է հոկտեմբերի 7-ին ՀԱՄԱՍ-ի հարձակումներից հետո Իսրայելի կողմից Պաղեստինի ինքնավարությունից հարկային եկամուտները պահելու հետ կապված հարցեր: Ըստ գոյություն ունեցող համաձայնագրերի՝ Իսրայելը Պաղեստինի ինքնավարության անունից հարկային եկամուտներ է հավաքում պաղեստինյան ներմուծումից և արտահանումից: Հոկտեմբերի 7-ից Իսրայելի կառավարությունը հրաժարվում է բաշխել հավաքագրված ամբողջ հարկերը, որոնք հիմնականում օգտագործվում են Պաղեստինի իշխանությունների կողմից պետական ​​աշխատողներին և թոշակառուներին վճարելու համար։

«Իսրայելի կողմից հավաքագրված Պաղեստինի բոլոր հարկային եկամուտները պետք է հետևողականորեն փոխանցվեն Պաղեստինի ինքնավարությանը՝ համաձայն նախնական պայմանավորվածությունների»,- ասվում է պաղեստինյան կողմի հայտարարության մեջ:

Նշվում է, որ Միացյալ Նահանգները սատարում է Իսրայելի պետության կողքին պաղեստինյան պետության ստեղծման ուղղությամբ շոշափելի քայլերը, որոնք «ապրելու են խաղաղ ու անվտանգ պայմաններում»։

Էմմա Չոբանյան