05.08.2026 | 19:14
«Գյոռմամիշից» մինչև «հորթ»․ ԱԺ-ում բանավեճ՝ բարեկրթության սահմանից այն կողմ. ՏԵՍԱՆՅՈՒԹ
Շուրջ 50 երկիր դատապարտել է Հյուսիսային Կորեայի կողմից ՌԴ-ին զենքի վաճառքը
Քաղաքականություն
10.01.2024 | 18:50
Մոտ 50 պետություններից բաղկացած խումբը դատապարտել է հյուսիսկորեական հրթիռների մատակարարումը Ռուսաստանին, ինչպես նաև Ուկրաինայի դեմ դրանց կիրառումը, գրում է DW-ի ռուսական ծառայությունը։
«Մենք խստորեն դատապարտում ենք ԿԺԴՀ-ի արտահանումն ու Ռուսաստանի կողմից հյուսիսկորեական բալիստիկ հրթիռների գնումը, ինչպես նաև Ռուսաստանի կողմից այդ հրթիռների օգտագործումն Ուկրաինայի դեմ 2023 թվականի դեկտեմբերի 30-ին և 2024-ի հունվարի 2-ին»,- ասվում է ԱՄՆ Պետքարտուղարության տարածված հայտարարության մեջ։
Փաստաթղթին միացել են Գերմանիան և գրեթե բոլոր եվրոպական երկրները, ինչպես նաև Կանադան, Իսրայելը, Ավստրալիան, Ճապոնիան և Հարավային Կորեան։
Պետությունները քննադատել են զենքի գնումը՝ ասելով, որ այն հակասում է ՄԱԿ-ի մի քանի բանաձևերի, որոնց աջակցել է Ռուսաստանը: Նրանք կոչ են արել ՄԱԿ-ի անդամ բոլոր երկրներին դատապարտել Մոսկվայի և Փհենյանի կողմից խախտումները։
Հայտարարության մեջ շեշտվում է, որ «Ռուսաստանի կողմից հյուսիսկորեական զենքի օգտագործումն ազդում է անվտանգության իրավիճակի վրա Եվրոպայում, Կորեական թերակղզում, Խաղաղ օվկիանոսի տարածաշրջանում եւ ամբողջ աշխարհում»:
Ամանորի գիշերը և դրանից հետո Ռուսաստանն իրականացրել է պատերազմի սկզբից ի վեր Կիևի, Խարկովի և Ուկրաինայի այլ քաղաքների վրա հարձակումների ամենամեծ ալիքներից մեկը՝ օգտագործելով բոլոր տեսակի հրթիռներ և հարձակողական անօդաչու սարքեր: Ավելի քան 40 մարդ մահացել է։ Դեկտեմբերի 29-ից ի վեր ռուսական զորքերը մոտ 300 հրթիռ և ավելի քան 200 անօդաչու թռչող սարք են արձակել Ուկրաինայի ուղղությամբ, հայտարարել է Ուկրաինայի նախագահ Վլադիմիր Զելենսկին։
