15.01.2026 | 12:47
Անի Ամիրաղյանը դուրս է եկել 1/8 եզրափակիչ
Ուկրաինայում պաշտոնապես արդարացրել են Սերգեյ Փարաջանովին
Քաղաքականություն
10.01.2024 | 12:20
Ուկրաինայի ռեաբիլիտացիայի ազգային հանձնաժողովը պաշտոնապես արդարացրել է մեծանուն կինոռեժիսոր Սերգեյ Փարաջանովին, որը 50 տարի առաջ 5 տարով դատապարտվել էր «միասեռականության համար»։ Այս մասին հայտնել է Ուկրաինայի Ազգային հիշողության ինստիտուտի ղեկավար Անտոն Դրոբովիչը, հաղորդում է currenttime.tv-ն։
Նա նշել է, որ Փարաջանովին արդարացնելու որոշումն ընդունվել է 2023 թ-ի դեկտեմբերի 20-ին։ Ազգային կոմիտեի որոշման մեջ նշվում է, որ ռեժիսորի քրեական գործի և արխիվային այլ փաստաթղթերի մանրամասն վերլուծությունից հետո պարզվել է, որ Փարաջանովի հետապնդման և դատապարտման հիմքում քաղաքական դրդապատճառ է եղել:
«Ռեաբիլիտացիայի հանձնաժողովի աշխատակիցների շնորհիվ պատմական ճշմարտությունը հաղթում է մոռացությանն ու բռնաճնշումներին՝ հույս առաջացնելով, որ հետագայում կդիտարկվեն ԽՍՀՄ-ում ինչպես քաղաքական, այնպես էլ շինծու քրեական հոդվածներով դատապարտված ուկրաինացի այլախոհների այլ գործեր ևս»,- ասել է Դրոբովիչը։
1974 թվականին Փարաջանովը դատապարտվել էր խիստ ռեժիմի ճամբարում 5 տարվա ազատազրկման «բռնաբարության» ու «պոռնոգրաֆիայի» մեղադրանքներով։ Դատավարության ժամանակ նա չէր հերքել ոչ ավանդական սեռական կողմնորոշում ունենալը, սակայն չէր ընդունել բռնության մեղադրանքները։
Սերգեյ Փարաջանովը համարվում է կինեմատոգրաֆիայի «խորհրդային նոր ալիքի» և «պոետիկ կինոյի» հիմնադիրներից մեկը։ Ռեժիսորը համաշխարհային ճանաչման հասավ «Մոռացված նախնիների ստվերները» և «Նռան գույնը» ֆիլմերից հետո։
Հայազգի ռեժիսորը ծնվել է Վրաստանում, աշխատել Հայաստանում և Ուկրաինայում, մահացել՝ Երևանում։
