Պենտագոնի ղեկավարը, որի հոսպիտալացման մասին Սպիտակ տունը տեղյակ չի եղել, քաղցկեղ ունի

ԱՄՆ Պենտագոնի ղեկավար Լլոյդ Օսթինը բուժվում է շագանակագեղձի քաղցկեղից, բարդություններ է ունեցել, որոնք հանգեցրել են նրան, որ Ամանորին նրան տեղափոխել են հիվանդանոց, որտեղ դեռևս շարունակում է բուժումը։ Այս մասին ասվում է Ուոլթեր Ռիդի ազգային ռազմական բժշկական կենտրոնի հայտարարության մեջ, գրում է CNN-ը։

Նշվում է, որ քաղցկեղը հայտնաբերվել է դեկտեմբերի սկզբին։ Դեկտեմբերի 22-ին նա ենթարկվել է «նվազագույն ինվազիվ վիրաբուժական միջամտության», որը կոչվում է պրոստատեկտոմիա՝ քաղցկեղը բուժելու համար: Օսթինը վիրահատությունից հետո վերականգնվել է և հաջորդ առավոտ վերադարձել տուն: Նշվում է նաև, որ նրա մոտ քաղցկեղը վաղ է հայտնաբերվել։

Հաղորդվում է, որ հունվարի 1-ին Օսթինը կրկին հոսպիտալացվել է՝ բարդությունների պատճառով։ Նրա մոտ հայտնաբերվել է միզուղիների վարակ։

Պենտագոնը բախվել է բուռն քննադատությունների, երբ ուրբաթ պարզվել է, որ նա օրեր շարունակ հիվանդանոցում է եղել՝ առանց հանրությանը ծանուցելու: Այնուհետև լուրեր տարածվեցին, որ նախագահ Ջո Բայդենը, ազգային անվտանգության բարձրաստիճան պաշտոնյաները, նույնիսկ պաշտպանության փոխնախարար Քեթլին Հիքսը, որը ստանձնել էր Օսթինի պարտականությունները, տեղյակ չեն եղել պաշտպանության նախարարի հոսպիտալացման մասին և իմացել են երեք օր անց:

Ազգային անվտանգության խորհրդի խոսնակ Ջոն Քիրբին ասել է, որ Բայդենը միայն երեքշաբթի առավոտյան է իմացել Օսթինի ախտորոշման մասին՝ այն հրապարակայնորեն բացահայտվելուց մի քանի ժամ առաջ:

«Սպիտակ տանը մինչ այսօր ոչ ոք չգիտեր, որ Պետագոնի ղեկավար Օսթինը շագանակագեղձի քաղցկեղ ունի, նախագահին այդ մասին անմիջապես տեղեկացրին»,- լրագրողներին ասել է Քիրբին:

Նա նաև նշել է, որ Բայդենը «լիովին վստահում է» իր պաշտպանության նախարարին և ծրագրում է պահել նրան այդ պաշտոնում իր պաշտոնավարման ընթացքում՝ միաժամանակ ընդունելով, որ իրավիճակը կատարյալ չէ:

Էմմա Չոբանյան