Մերձմոսկվայից հետո Նիժնի Նովգորոդի և Եկատերինբուրգի բնակիչները անոմալ սառնամանիքներին մնացել են առանց ջեռուցման

Ցրտաշունչ ձմեռը հանգեցրել է Ռուսաստանի բնակարանային և կոմունալ ծառայությունների համակարգի փլուզման, ամբողջ երկրում հարյուր հազարավոր ռուսաստանցիների թողել է առանց ջեռուցման՝ անոմալ ցածր ջերմաստիճանի պայմաններում, գրում է The Moscow Times-ը:

Մոսկվայի շրջանից հետո, որտեղ ջեռուցումը խափանվել է մի քանի բնակավայրերի ավելի քան 200 բնակելի տներում, ջերմամատակարարումը դադարեցվել է Նիժնի Նովգորոդի և Եկատերինբուրգի բնակարաններում։

Այսպես, Նիժնի Նովգորոդի Կանավինսկի և Պրիոկսկի թաղամասերում հունվարի 6-ից ջեռուցման ընդհատումներ են սկսվել, հայտնում է NewsNN-ը։ Ներկայումը, Teploenergo-ի պնդմամբ, բոլոր խնդիրները լուծված են, սակայն դատախազությունն արդեն ուսումնասիրում է կատարվածը։

Եկատերինբուրգում էլ ջեռուցումը խափանվել է 324 տներում, հինգ դպրոցներում և երկու մանկապարտեզում, «Ինտերֆաքս»-ին հայտնել են TPlus ընկերության Սվերդլովսկի մասնաճյուղի մամուլի ծառայությունից։

«Էներգետիկները վերանորոգում են Յուժնայա կաթսայատան սարքավորումները։ Այս ընթացքում կրճատվել են ջերմության և տաք ջրի պարամետրերը»,- նշել են նրանք։

Միաժամանակ, ըստ Ուրալի հիդրոօդերեւութաբանական կենտրոնի տվյալների, երեքշաբթի քաղաքում օդի ջերմաստիճանը -19 աստիճան է։

Բացի այդ, վթարի պատճառով Պրիմորսկի երկրամասի Նախոդկայում 88 բազմաբնակարան շենք մնացել է առանց ջերմամատակարարման։ Կաթսայատանը սարքավորումներից մեկի սնուցման գծի վնասման հետևանքով դադարեցվել է Վերխնե-Մորսկայա, Գագարին, Նախոդկինսկի պողոտա, Լերմոնտով, Գոնչարովա, Զոյա Կոսմոդեմյանսկայա փողոցների բազմաբնակարան շենքերի ջերմամատակարարումը։

«Ընդհանուր առմամբ, 88 բազմաբնակարան շենքերի, ինչպես նաև անչափահասների համար նախատեսված 4 հաստատությունների ավելի քան 6 հազար բնակիչներ մնում են առանց կոմունալ ծառայությունների»,- ՏԱՍՍ-ին հայտնել են շրջանի դատախազությունից։