09.04.2026 | 16:16
Նեթանյահուն զգուշացնում է՝ Իսրայելը կշարունակի հարվածել «Հըզբոլլահին» որտեղ անհրաժեշտ է
Մանվել Գրիգորյանի առողջական վիճակն օրեցօր ավելի է վատանում. փաստաբանները սպասում են խափանման միջոցի փոփոխմանը
03.08.2018 | 19:15
Ազգային ժողովի ՀՀԿ խմբակցության պատգամավոր, գեներալ Մանվել Գրիգորյանի առողջական վիճակն օրեցօր ավելի է վատանում։ Այս մասին Factor.am-ին հայտնեց նրա փաստաբան Արսեն Մկրտչյանը։
«Այն հիվանդությունը, որը գեներալն ինքը ունի, քրեակատարողական հիմնարկում հնարավորություն չկա կայուն պահել»,- ասաց նրա պաշտպանը՝ նշելով, որ վարույթն իրականացնող մարմնի կողմից փորձաքննություն է նշանակված, որի արդյունքում հնարավոր է՝ խափանման միջոցը փոխվի:
Մանվել Գրիգորյանի փաստաբանը շեշտեց՝ շարունակում են հուսալ, որ նրա խափանման միջոցը կփոխվի, այլապես, կմտածեն, որ նպատակադրված և հանձնարարված խոշտանգման են ենթարկում իր պաշտպանյալին:
Հիշեցնենք, որ Մանվել Գրիգորյանը մեղադրվում է ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու կամ կրելու մեջ, որը կատարվել է մի խումբ անձանց կողմից նախնական համաձայնությամբ: Ինչպես նաև մեղադրվում է առանձնապես խոշոր չափերի յուրացում կատարելու մեջ։
Արսեն Մկրտչյանի խոսքով՝ հատկապես յուրացումներ կատարելու մեղադրանքը «ֆեյք մեղադրանք է, որը ինչպես ծնվել է, այնպես էր կջախջախվի»: «Սոցիալական մեդիաներում պատվիրված, ուղղորդված հանրային կարծիք ձևավորելու նպատակով շահագրգիռ անձանց կողմից վճարված մեղադրանք է, որի հիմքում ոչինչ չկա»,- շեշտեց Մանվել Գրիգորյանի փաստաբանը:
