10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
Մեր ազգը պիտի ընդունի, որ առաջիկայում նորից Սերժ Սարգսյանը պիտի ղեկավարի երկիրը. Գալուստ Սահակյան
Քաղաքականություն
07.07.2017 | 17:44
Մեր ազգը պիտի ընդունի, որ առաջիկայում նորից Սերժ Սարգսյանը պիտի ղեկավարի երկիրը: Այս մասին ԱԺ-ում լրագրողների հետ զրույցում հայտարարել է ԱԺ նախկին նախագահ, Հանրապետական խմբակցության պատգամավոր Գալուստ Սահակյանը՝ անդրադառնալով 2018 թվականից հետո Հայաստանի վարչապետի պաշտոնը զբաղեցնելու հարցին:
«Հիմա այսօր հարցնում են, ով պիտի լինի, ես ասում եմ հետևյալը՝ այսօր քաղաքական դաշտում, որն ունի քաղաքական մեծ թիմ, և որը մասնակցել է նոր անկախ Հայաստանի ամբողջական պատմությանը, մեկ անձ է մնացել՝ Սերժ Սարգսյանը, այսինքն՝ երկրի ղեկավարումը պիտի գնա Սերժ Սարգսյանին»,- հայտարարել է Գալուստ Սահակյանը:
Լրագրողների դիտարկմանը, թե մատնանշելով Սերժ Սարգսյանի անցած ճանապարհը, արդյոք չպե՞տք է հաշվի առնեն նաև այն, որ Կարեն Կարապետյանն էլ վատ վարկանիշ չունի, ՀՀԿ պատգամավորը պատասխանեց.
«Քաղաքական շատ մեծ գործիչներ կան, որոնք ճանապարհ են անցել, բայց, ըստ էության, ամենամեծ քաղաքական թիմը և պետության անկախության ամբողջական ճանապարհն անցել է Սերժ Սարգսյանը: Այսօր քաղաքական մեծ թիմ ունեցող չկա և ես չեմ կարծում, որ Կարեն Կարապետյանը չի ցանկանալու, որ Սերժ Սարգսյանն իր գործունեությունն առաջ տանի: Իհարկե, շատ լավ է, ես ուրախանում եմ, և մենք էլ ամեն ինչ արեցինք, որ ժողովրդի կողմից ընդունվի Կարեն Կարապետյանը, որպես նոր ոգու տեր վարչապետ և կարողանա այդ գործերն առաջ տանի: Պետք է հասկանանք՝ պետությունն ինչ բան է, ով է ստեղծել, վերջին հաշվով երբ մարդիկ ստեղծել են, բավական շատ ընկերներ ու մարդիկ են կորցրել, որ կարողացել են պետություն ստեղծել և դա մինչև վերջ պետք է տանել»,- ասաց նա:
