15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ամանորի գիշերը Ռուսաստանն Ուկրաինայի ուղղությամբ 90 «Շահեդ» է արձակել
Քաղաքականություն
01.01.2024 | 15:15
Նոր մանրամասներ են ի հայտ գալիս Ամանորի գիշերը ռուսական անօդաչու թռչող սարքերի հարձակման մասին։ Ըստ ուկրաինական կողմի՝ ռեկորդային թվով՝ 90 «Շահեդ»-ներ են գործարկվել, որոնցի 87-ը խոցվել է, գրում է BBC-ի ռուսական ծառայությունը։
«Անօդաչու թռչող սարքերի հզոր զանգվածային հարձակումը շարունակվել է 11 ժամ շարունակ։ Կամիկաձե ԱԹՍ-ները գործի են դրվել երեկոյան, մարտական աշխատանքն ավարտվել է առավոտյան ժամը 4-ի սահմաններում։ Ամանորի գիշերը հարավային հակաօդային պաշտպանության ուժերը խոցել են «Շահեդ-131/136» տիպի 51 անօդաչու թռչող սարք․ 28-ը՝ Օդեսայի մարզում, 14-ը՝ Նիկոլաևի շրջանում, 5-ը՝ Վիննիցայի շրջանում, 2-ը՝ Դնեպրոպետրովսկի շրջանում, 1-ական Խերսոնի և Կիրովոգրադի մարզերում»,- ասվում է Ուկրաինայի հարավի պաշտպանական ուժերի հաղորդագրության մեջ։
Տեղի իշխանությունների տվյալներով՝ Օդեսայի մարզում հարվածները հասցվել են նավահանգստի տերմինալին և բնակելի շենքերին։ Օդեսայի ոստիկանական բաժանմունքի ղեկավար Օլեգ Կիպերը հայտնել է, որ հարձակման արդյունքում 15-ամյա դեռահաս է զոհվել, յոթ մարդ վիրավորվել է, նրանցից երեքը հոսպիտալացվել են։ Անօդաչու թռչող սարքի բեկորները վնասել են առնվազն երեք բազմաբնակարան շենք։
Նիկոլաևի շրջանում հարվածները դիպել են ենթակառուցվածքի օբյեկտին, ինչի հետևանքով ուժեղ հրդեհ է բռնկվել, սակայն այն մարվել է։
Վիննիցայի շրջանում անօդաչու թռչող սարքի բեկորները վնասել են ավտոտնակ և բնակելի տան պատուհանները։ Հաղորդվում է, որ Լվովում անօդաչու թռչող սարքի հարձակման հետևանքով տուժել են Ռոման Շուխևիչի թանգարանը և Դուբլիանի համալսարանը։
