Հաղորդաշարեր
30.12.2023 | 19:02«Ես դա կորուստ չեմ համարում, կորցրածը վերադառնալու է: Ինչպես ասվում է Սուրբ գրքում՝ «Եվ քամին վերադառնում է ի շրջանս յուր»: Ժամանակ է, պետք է անցնի, գետը հոսում է, մի տեղ կանգ է առնում»,- Factor TV-ի հետ զրույցում նման տեսակետ է հայտնում երգիչ, երգահան Ռուբեն Հախերդյանը՝ անդրադառնալով Արցախի կորստին:
Նրա տպավորությամբ՝ մենք չենք հաշտվել Արցախը կորցնելու մտքի հետ, ուղղակի պետք է համբերատար լինենք. «Տքնաջան, եզի նման պետք է վարենք մեր հողը: Ի վերջո, վստահ եմ, որ Արցախը վերադառնալու է մեզ երեսուն, թե հիսուն տարի հետո»:
Ռուբեն Հախվերդյանը խոսում է նաև Հայաստանի ներքին և արտաքին քաղաքական կյանքից։
«Վարչապետին պետք է փոխել, նա պետք է ասի՝ կա՛մ էս կողմ ենք գնում, կա՛մ էն կողմ, որովհետև անընդհատ էս կողմ-էն կողմ թռչելով չի լինի՝ կա՛մ պետք է դեպի ազատ աշխարհ շրջվել, կա՛մ Ռուսաստան՝ մեռնող, ֆեոդալական, հետամնաց երկիր: Եթե պետք է մտածենք, որ ռուսը չլինի, մենք էլ չենք լինի, ավելի լավ է՝ չլինենք: Քավորսանիկային մաֆիոզ խմբավորումները, ռուսամոլ տականքները մեզանում շատ են: Մինչդեռ Ռուսաստանը գլորում է մեզ անդունդը, ուզում է մեզ «բուտերբրոդ» անել «Զանգեզուրի միջանցքով»»,- ասում է նա:
Երգահանն անդրադառնում է նաև մեր մտավորականությանը, խոսում խնդիրների մասին. «Մեր ժողովուրդը չունի էլիտա, բայց նախկինում կար երևանյան մտավորականություն: Իսկ եթե ազգը չունի էլիտա, նմանվում է խոզի բոլուկի: Իմ հույսը երիտասարդ սերնդի վրա է»:
Ռուբեն Հախվերդյանը խոսում է մեր հանրության շրջանում տիրող բարոյահոգեբանական վիճակի մասին. «Ո՞վ է հիշեցնողը, որ մենք հաղթանակած ազգ ենք, բոլորը կասկածում են բոլորի վրա: Մարդկանց մեջ գզվրտոց մտցնելը շատ ձեռնտու է Ռուսաստանին. այդ միջոցով ժողովուրդը բարոյազրկվում է»:
Երգահանը, սակայն, այն համոզման է, որ դժվարին իրավիճակներում երբեք չպետք է կորցնել հույսը։
«Ով իր հույսը կորցնում է, սատանայի հետ է ընկերանում։ Ես երբեք իմ հույսը չեմ կորցրել: Նույնիսկ մեծ խավարից հետո լույս է բացվում»,- եզրափակում է Ռուբեն Հախվերդյանը:
Մանրամասները՝ տեսանյութում:
Աննա Բաբաջանյան
