Քաղաքականություն
28.12.2023 | 18:05
Ադրբեջանի իշխանամերձ Միջազգային հարաբերությունների վերլուծության կենտրոնի խորհրդի նախագահ Ֆարիդ Շաֆիևը մամուլի ասուլիսում ասել է, որ որոշ հարցեր, որոնք խանգարում էին Բաքվի և Երևանի միջև խաղաղության պայմանագրի ստորագրմանը, արդեն լուծված են։
«Ադրբեջանի նպատակը Հայաստանի հետ խաղաղության պայմանագիրն է, մենք դրան շատ մոտ ենք»,- ասել է Շաֆիևը՝ նշելով, թե «սահմանների սահմանազատման և սահմանագծման հարցը չի ներառվի խաղաղության պայմանագրում, քանի որ այդ գործընթացը շատ երկար է»։
Բացի այդ, նա ընդգծել է, որ անկլավների հարցը լուծվելու է Ադրբեջանի և Հայաստանի միջև սահմանազատման գործընթացում։ Շաֆիևը նաև հայտարարել է, թե Բաքուն տարածքային պահանջներ չունի Հայաստանի նկատմամբ։ Ըստ փորձագետի՝ Հայաստանի տարածքով դեպի Նախիջևան երկաթգիծ անցկացնելու հարցը կապված է Երևանի դիրքորոշման հետ դրա նկատմամբ վերահսկողության հարցում։
«Սա ավելի շատ ռուս-հայկական խնդիր է, քան ադրբեջանա-հայկական»,- նշել է Շաֆիևը:
Նա նաև բողոքել է Ֆրանսիայի և Հայաստանի ռազմական համագործակցությունից։
«Մեզ անհանգստացնում է Ֆրանսիայի և Հայաստանի միջև ռազմական համագործակցությունը։ Մենք ներխուժե՞լ ենք Հայաստան, մենք ավերե՞լ ենք նրանց տարածքը։ Եթե Հայաստանը զինվում է, ապա դա պետք է հաշվի առնել։ Վերջերս մի շարք հոդվածներ են հրապարակվել այն մասին, թե, իբր, Ադրբեջանը ցանկանում է ռազմական միջամտություն իրականացնել Զանգեզուրում։ Դա արվում է պատմությունը ջնջելու և Ադրբեջանին որպես ագրեսոր ցույց տալու համար, իբր, Հայաստանը ժողովրդավարություն է կառուցում, իսկ մենք վտանգ ենք ստեղծում նրանց ժողովրդավարության համար»,- ասել է Շաֆիևը։
Էմմա Չոբանյան
