25.11.2024 | 18:25
Խորտակված նավի վրա ՀՀ քաղաքացիներ չեն եղել. ԱԳՆ
Քրեական ենթամշակույթի դեմ պետք է անզիջում պայքար լինի. Գրիգոր Մինասյանը ներկայացրել է ՔԿԾ նորանշանակ պետին
25.12.2023 | 15:11
Արդարադատության նախարար Գրիգոր Մինասյանը Քրեակատարողական ծառայության աշխատակազմին է ներկայացրել Ծառայության նորանշանակ պետ Ամբակում Գրիգորյանին․ տեղեկացնում են ՀՀ ԱՆ-ից։
Նախարարը շնորհակալություն է հայտնել ՀՀ ԱՆ ՔԿԾ նախկին պետ Սերգեյ Ատոմյանին կատարված աշխատանքի և Ծառայությունում ներդրած ավանդի համար:
Գրիգոր Մինասյանը հատուկ ընդգծել է, որ Ամբակում Գրիգորյանն ունի այն բարձր պրոֆեսիոնալիզմը, որի շնորհիվ արդեն իսկ մեկնարկած և առաջիկայում սպասվելիք ծրագրերը կկարողանան կյանքի կոչվել: Նախարարը նշել է, որ օր ու գիշեր պետք է աշխատել՝ վարչապետ Նիկոլ Փաշինյանի դրած նշաձողին հասնելու համար:
ՔԿԾ նախկին պետ Սերգեյ Ատոմյանը շնորհակալություն է հայտնել համատեղ աշխատանքի համար և ընդգծել, որ Ծառայություն ղեկավարելը բավականին բարդ է՝ հաշվի առնելով նրա յուրահատկությունները։ Նա նշել է, որ Ամբակում Գրիգորյանը բարձր կամային հատկանիշներ ունեցող անձ է ու կկարողանա ղեկավարել Ծառայությունը:
Գրիգոր Մինասյանը նշել է նաև, որ ցանկալի արդյունքներ արձանագրելու համար անհրաժեշտ է մի շարք բարեփոխումներ իրականացնել: Անդրադարձ է կատարվել քրեական ենթամշակույթի դեմ անզիջում պայքարին ու այս ուղղությամբ առաջիկայում իրականացվելիք աշխատանքներին:
Քննարկվել են 2024 թ.-ից մեկնարկող Քրեակատարողական ծառայության աշխատակիցների ատեստավորման գործընթացի մանրամասները: Նախարարը ևս մեկ անգամ նշել է, որ Ծառայությունը պետք է համալրված լինի որակյալ կադրերով, որոնց շնորհիվ էլ հնարավոր կլինի պայքարել թե՛ քրեական ենթամշակույթի, թե՛ հիմնարկներ ներթափանցող արգելված իրերի դեմ:
Ամբակում Գրիգորյանը շնորհակալություն է հայտնել պատասխանատու պաշտոնում իրեն նշանակելու համար և վստահեցրել, որ համատեղ ջանքերի շնորհիվ կկարողանան հասնել հաջողությունների, և կիրականացվեն համակարգին վերաբերելի բոլոր ծրագրերը: Այնուհետ նախարարը և Քրեակատարողական ծառայության ղեկավար կազմը քննարկել են Ծառայությունում առկա խնդիրներն ու դրանց լուծման ճանապարհները:
Գրիգոր Մինասյանը նշել է, որ առաջիկայում սպասվելիք փոփոխությունները լավարկելու են Ծառայության որակը:
Արդարադատության նախարարը ևս մեկ անգամ շնորհավորել է նորանշանակ պետին ու մաղթել արդյունավետ և բեղմնավոր աշխատանք՝ ի նպաստ Հայաստանի Հանրապետությանը:
