07.10.2026 | 14:11
Վենսը հայտարարել է, որ պատերազմին վերջ տալու համար Իրանը պետք է կրճատի ուրանի հարստացումը
Արգենտինայի նախագահը խոստանում է լայնածավալ տնտեսական բարեփոխումներ
Քաղաքականություն
21.12.2023 | 12:02
Արգենտինայի նոր նախագահ Խավիեր Մայլին հայտարարել է տնտեսական ոլորտին առնչվող 300 գործող նորմերի վերացում կամ փոփոխության մասին։ Հեռուստաուղերձում նա ընդգծել է բարեփոխումների հրատապությունը՝ նշելով, որ ներկայիս կարգավորումները խոչընդոտում են տնտեսական աճին, գրում է DW-ի ռուսական ծառայությունը:
Սպասվում է աշխատուժի և անշարժ գույքի շուկան կարգավորող մի շարք օրենքների ուժը կորցրած ճանաչում։ Բացի այդ, բոլոր պետական ընկերությունները կվերածվեն բաժնետիրական ընկերությունների՝ հետագա մասնավորեցման նպատակով։
Նույն օրը Բուենոս Այրեսում հազարավոր մարդիկ երթ են կազմակերպել ընդդեմ նոր կառավարության ազատական տնտեսական քաղաքականության։ Բողոքի ակցիան հիմնականում խաղաղ է ընթացել։ Իշխանություններն ավելի վաղ զգուշացրել էին կոշտ պատասխան տալ ցուցարարների կողմից փողոցների հնարավոր շրջափակմանը։
Արգենտինան, որ ՀՆԱ-ով և տարածքով Հարավային Ամերիկայի մեծությամբ երկրորդ երկիրն է, գտնվում է ծանր տնտեսական ճգնաժամի մեջ։ Բնակչության մոտ 40 տոկոսն ապրում է աղքատության շեմից ցածր։ Խնդիրների հաղթահարմանը խոչընդոտում են պետական ուռճացված ապարատը, աշխատանքի ցածր արտադրողականությունը և ստվերային տնտեսության բարձր մակարդակը։
