14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ադրբեջանում կառավարության քննադատների դեմ սկսված վհուկների որսը խոսքի ազատության, մարդու իրավունքների հանդեպ արհամարհանքի դրսևորում է. HRW
20.12.2023 | 22:30
Human Rights Watch միջազգային իրավապաշտպան կազմակերպությունը դատապարտել է Ադրբեջանում ընդդիմության առաջնորդ Թոֆիգ Յագուբլուի, ինչպես նաև լրագրողների ու ակտիվիստների ձերբակալությունները։ Կազմակերպության հայտարարության մեջ նշվում է, որ Ադրբեջանի իշխանությունները կալանավորել են ընդդիմության առաջնորդ և կառավարության անողոք քննադատ Թոֆիգ Յագուբլուին կեղծիքների և խարդախության մեղադրանքով։ Նրա կալանավորումը վերջինն է Ադրբեջանում լրագրողների և կառավարության այլ քննադատների նկատմամբ հալածանքների շարքում:
«Ադրբեջանի իշխանությունները շարունակում են հարձակումները կառավարության հակառակորդների, լրագրողների և այլ քննադատների վրա։ Թոֆիգ Յագուբլուի ձերբակալությունը երկրի քննադատական ձայները լռեցնելու օրինաչափության մեջ է»,- ասել է Human Rights Watch-ի Եվրոպայի և Կենտրոնական Ասիայի փոխտնօրեն Գիորգի Գոգիան:
Դեկտեմբերի 15-ին Բաքվի Նարիմանովի շրջանային դատարանը Յագուբլուի նկատմամբ 4 ամիս ժամկետով նախնական կալանք է սահմանել կեղծիքի և խարդախության մեղադրանքով հետաքննության ընթացքում:
Կազմակերպությունը նշում է, որ Յագուբլուի նկատմամբ չհիմնավորված նախնական կալանքի որոշումը խախտում է Մարդու իրավունքների եվրոպական կոնվենցիայով պահանջվող կամայական կալանքի դեմ չափանիշները։ Յագուբլուն հերքում է բոլոր մեղադրանքները՝ նշելով, որ թիրախավորվել է իր քաղաքական ակտիվության պատճառով։
«Ադրբեջանի կառավարության կողմից քննադատների դեմ վհուկների որսը խոսքի ազատության և մարդու իրավունքների պաշտպանության հանդեպ նրա արհամարհանքի դրսևորումներից է։ Իշխանությունները պետք է անհապաղ ազատեն Յագուբլուին և վերջ տան քննադատող լրագրողների ու ընդդիմադիր ակտիվիստների նկատմամբ բռնաճնշումներին»,- ասել է Գոգիան։
Էմմա Չոբանյան
